Қаржы мониторингі агенттігі (ҚМА) жалған тіс емханаларының иелерін іздестіруде.
Ведомствоның баспасөз қызметінің мәліметінше, Аслан Дүйсенов, Ғаббас Иманбаев және Есімхан Елешев БЖЗҚ-дан (Бірыңғай жинақтаушы зейнетақы қоры) қаражатты заңсыз шығару бойынша қылмыстық схемалар ұйымдастырды деп күдіктеледі.
Олар тіс емдеу қызметтерін көрсету деген желеумен жалған медициналық құжаттар рәсімдеп, 46 млрд теңгеден астам қаражат шығарған.
Күдіктілер Ақтау және Атыраудағы медициналық қызметпен айналыспаған және халыққа қызмет көрсетпеген жеті тіс емханасын пайдаланған.
Күдіктілерге сырттай қамауда ұстау түріндегі бұлтартпау шарасы таңдалды.
Күдіктілердің бірі – Дүйсенов – бұрын полицей болған және теріс себептермен жұмыстан шығарылған. 2016 жылы ол адамды өзін-өзі өлтіруге дейін жеткізу және лауазымдық өкілеттіктерін асыра пайдалану үшін бес жылға бас бостандығынан айыруға сотталды.
Еске сала кетейік, 9 қыркүйекте Қаржы мониторингі агенттігінің төрағасы Жанат Элиманов Президент Қасым-Жомарт Тоқаевқа зейнетақы жинақтарын пайдалану кезіндегі бұзушылықтар туралы баяндады. Оның деректері бойынша, БЖЗҚ-дан тіс емдеу қызметтері деген желеумен шамамен 200 млрд теңге негізсіз шығарылған.
Осыдан кейін 15 қыркүйекте Отбасы банкі зейнетақы жинақтары есебінен тіс емдеуге ақы төлеуге өтініштерді қабылдауды уақытша тоқтатты. Сол күні Атырау облысында жинақтарды шығаруға көмектескен бес қылмыстық топ анықталды. Схемаға 30-дан астам тіс емханасы тартылған.
16 қыркүйекте денсаулық сақтау министрлігі жалпы талқылауға тіс емдеу қызметтерін БЖЗҚ есебінен төлеу мүмкіндігін жоятын бұйрық жобасын ұсынды.