Қызылорда облысы бойынша Қаржылық мониторинг агенттігі (ҚМА) бірнеше қоғамдық ұйымдардың мүшесіне қатысты алаяқтық фактісі бойынша сотқа дейінгі тергеуді бастады.
«Азаматша балалар шығармашылығы мен спорт саласында анықталған, «Даму бала» платформасы бойынша қызмет көрсететін кәсіпкерлік субъектілеріне қойылатын талаптарға сәйкес келмеуіне қатысты тексеру актілерінен бұзушылықтарды алып тастау үшін 81 кәсіпкерлік субъектісінен сенімді тұлғалар арқылы 55 миллион теңгеден астам қаражат алды деп күдіктеледі», - деп хабарлады ведомствоның баспасөз қызметі.
ҚМА қызметкерлері спорттық жабдықтардың белгіленген талаптарға сәйкес келмеуін, балалардың келуін есепке алудың бұзылуын, бейнебақылау жүйелерінің толық сәйкес келмеуін және басқа да бұзушылықтарды анықтады.
Осы факт бойынша полиция қызметкерлері тергеу жүргізуде. Күдіктіге қатысты сот үй қамағы түріндегі бұлтартпау шарасын таңдады.
Еске сала кетейік, қараша айының басында Алматы облысында «Шаңырақ» қоғамдық бірлестігінің жетекшісі Алмазбек Садырбай ұсталды. Ол Балқаш, Еңбекшіқазақ, Кеген, Райымбек және Ұйғыр аудандарында бір топ адамдармен жалған ауылшаруашылық кооперативтерін құруда күдікке ілінді.
Кейінірек еріктілер қозғалысының белсендісі және «BizBirgemiz Qazaqstan» қоғамдық қайырымдылық қорының құрылтайшысы Перизат Қайратқа қатысты ҚМА тергеу жүргізіп жатқаны хабарланды. Ол көктемгі су тасқынынан зардап шеккендерге көмектесу үшін жиналған 1,5 млрд теңгеден астам қаражатты жымқырды деп күдіктеледі.