Астана халықаралық қаржы орталығының қаржылық қызметтерді реттеу комитеті (AFSA) жалған лицензиясы бар криптовалюта айырбастау пункті туралы ескертті.
Informburo.kz деректері бойынша, бұл криптовалюта айырбастау қызметтерін ұсынатын Astana Exchange компаниясына қатысты. Хабарланғандай, азаматтарды AFSA лицензияланған немесе тіркелген компанияларының жария тізілімін тексеруге шақырады.
"Astana Exchange қаржылық қызметтер көрсету үшін жалған лицензияны пайдаланады. Жүргізілген талдау нәтижесінде AFSA ұйымның АҚО-да тіркелмегенін және қаржылық қызметтер көрсетуге қолданыстағы лицензиясы жоқ екенін анықтады. Осылайша, оның қызметі орталық актілерінің нормаларына қайшы келеді", – деп хабарлады комитетте.
Сонымен қатар, AFSA қазақстандықтарға ешқандай жағдайда бұл компаниямен іскерлік қарым-қатынасқа түспеуді, сондай-ақ қандай да бір тарапқа ақша жібермеуді немесе бермеуді ұсынады.
Еске сала кетейік, бұрын Астана қаласының қылмыстық істер жөніндегі соты екі астаналық тұрғынды АҚО-да лицензиясыз және тіркеусіз заңсыз кәсіпкерлік қызметпен айналысқаны үшін соттады. Сотта түсіндіргендей, алаяқтар алдын ала сөз байласып, екі жыл бойы Binance платформасында USDT айырбастаумен заңсыз айналысып, 7 млрд теңгеден астам табыс тапқан.