Жыл басынан бері Шымкентте 200-ден астам кәсіпкер әлеуметтік маңызы бар азық-түлік тауарларының (ӘМАТ) бағасын негізсіз көтергені үшін жауапкершілікке тартылды. Қалалық ауыл шаруашылығы басқармасының мәліметінше, оның 15-і ет бағасын негізсіз көтергені үшін айыппұл төлеген.
Қалалық әкімдіктің ақпараты бойынша, мониторинг жүздеген сауда нүктелерін қамтыған. Сиыр еті (жауырын-төс сүйекті бөлігі) бақылауға жататын 19 ӘМАТ тізбесіне енгізілгені атап өтілді.
«Қазіргі уақытта Шымкентте 60-қа жуық әлеуметтік сауда нүктесі жұмыс істейді. Сонымен қатар, апта сайын ауыл шаруашылығы жәрмеңкелері өткізіледі, онда сүйекті сиыр еті тұрақты бағамен – килограмына 3200–3300 теңге аралығында сатылады. Ет өнімдері Түркістан облысының мал шаруашылығы фермаларынан тікелей жеткізіледі», — деді ауыл шаруашылығы басқармасының басшысы Талғат Мекамбаев.
Ол таза сиыр етінің (жамбас еті) бағасы реттелетін тауарлар тізіміне кірмейтінін нақтылады. Мекамбаевтың айтуынша, «Қасқасу-С» және «Бәйтерек» шаруа қожалықтарымен жасалған келісімшарттар аясында босату бағасы килограмына 2620 теңгені құрайды.
Сонымен қатар, «тауар өткізу схемасы» механизмі бойынша «Magnum» және «Грамад» сауда желілерімен келісімдер жасалды, онда сиыр еті (жауырын-төс сүйекті бөлігі) килограмына 2590 теңгеден сатылады.
Бұл ретте қалалық базарларда коммерциялық ет те сатылады, оның құны килограмына 3800–4000 теңгеге жетеді. Мамандардың айтуынша, жеке сауда нүктелеріндегі бағаның өсуі маусымдық сұранысқа, жем-шөптің қымбаттауына және экспорттың ұлғаюына байланысты.
Әкімдікте Шымкентте ет тапшылығы жоқ екенін атап өтіп, қала тұрғындарын бағасы реттелетін сауда нүктелеріне назар аударуға шақырды.
Еске салайық, қаңтар айында Шымкент тұрғындары ет бағасының күрт өскеніне шағымданған. Сол кезде қой еті мен сиыр етінің құны 500 теңгеге өскен. Қала тұрғындары желтоқсан айында сиыр етін 2700 теңгеден, ал қаңтарда 3200 теңгеден сатып алғандарын айтқан.
Шілдеде Шымкентте сиыр етінің бағасы жамбас етінің килограмына 5000 теңгеге жеткені, бір апта бұрын баға 4200 теңге болғаны хабарланған. Сарапшылар бағаның өсуін жем-шөп дақылдарының егінін жойған қатты ыстықпен байланыстырады. Олардың бағалауынша, күзге қарай ет одан әрі қымбаттайды, ал Шымкенттен кейін Қазақстанның басқа аймақтарында да баға өсуі мүмкін.