Ақтау прокуратурасы валюталық заңнама талаптарын бұза отырып, $1,8 млн сомасын Қазақстан аумағынан тыс жерге шығарған компанияға қатысты әкімшілік істі тоқтату туралы қаулыға шағымданды.
Ведомство баспасөз қызметінің мәліметінше, өтінішхатты қарап, облыстық соттың сот алқасы бұрын қабылданған шешімді жойып, компанияны әкімшілік құқық бұзушылық жасағаны үшін кінәлі деп таныды.
Нәтижесінде сот компанияға «валюталық түсімді уақтылы қайтармағаны» үшін 153 млн теңге мөлшерінде айыппұл тағайындады. Қаулы заңды күшіне енді.
Еске сала кетейік, Қазақстанда валюталық бақылауды күшейту аясында Ұлттық банк 2025 жылдың басынан бастап валюталық операцияларды жүргізу қағидаларына бірқатар өзгерістер енгізді:
- Заңды тұлғалар үшін: Бір жұмыс күні ішінде $50 000 астам сомаға қолма-қол ақшасыз шетел валютасын сатып алған кезде валюталық шартты ұсыну және сатып алу мақсатын көрсету талап етіледі. Егер сатып алынған валютаның бір бөлігі 10 күн ішінде пайдаланылмаса, оны кері сату қажет.
- Жеке тұлғалар үшін: $10 000 сомасына тең немесе одан асатын барлық шығыс төлемдері мен кіріс аударымдары операцияның заңдылығын растайтын құжаттарды міндетті түрде ұсынуды талап етеді.
- Резидент еместер үшін: Эквиваленті $50 000 астам сомаға теңгемен қолма-қол ақшасыз шетел валютасын сатып алған кезде теңгемен қаражаттың шығу тегін растайтын құжаттарды ұсыну қажет.
Бұл шаралар капиталды заңсыз шығарудың алдын алуға және елдегі валюталық операцияларды бақылауды күшейтуге бағытталған.