Мәжіліс депутаты Үнзила Шапақ заңнама және сот-құқықтық реформа комитетінің отырысында 2023 жылы ұрланған қаражат және азаматтардың атына рәсімделген несиелер сомасы 21 млрд теңге құрағанын хабарлады.
«QOS live» мәліметінше, бұл тек өздерін құқық қорғау органдарының немесе банктердің қызметкерлері ретінде таныстырып, әртүрлі сылтаулармен қысқа мерзімде тез пайда ұсынатын алаяқтық әрекеттерге қатысты.
Депутат Шапақтың айтуынша, Қазақстанда 2023 жылы осындай 21 мыңнан астам қылмыс тіркелген.
Еске салайық, бұған дейін Ақмола облысында жалған полицейлер 66 жастағы тұрғынның картасынан ақша ұрлап, оның атына тауарлық несие рәсімдеген. Ер адам 3 млн теңгеден астам қаражатынан айырылған.
Сондай-ақ хабарланғандай, Ақтөбедегі сот орындаушылары мен коллекторлық агенттіктердің қызметкерлері берешекті өндіру мақсатында өздерін судья және полицейлер ретінде таныстырған. Олар адамдарға қоңырау шалып, өздерін құқық қорғау органдары мен прокуратура қызметкерлері, сондай-ақ судьялар немесе сот хатшылары ретінде таныстырған.