«Қазақстан темір жолы» ҰК АҚ (КТЖ) теміржол жолдарын заңсыз жалға беріп, бұдан 4 млрд теңге табыс тапқан.
«Теміржол операторы 3 жыл бойы «Шығысмашзауыт» АҚ-на мүліктік жалға берілмейтін станциялық жолдарды уақытша иеленуге беріп, бұл жалға алушыларға вагондардың бос тұруы үшін шамамен 4 миллиард теңге көлеміндегі міндетті төлемдерден жалтаруға мүмкіндік берді», — деп хабарлады бас көлік прокуратурасының баспасөз қызметі.
Осыған байланысты прокуратура Абай, Ақтөбе, Жамбыл, Қарағанды облыстарының соттарына жалдау шарттарын бұзу туралы талаптармен талап-арыздар жолдады.
Қазіргі уақытта қадағалау органының талап-арыздары толық көлемде қанағаттандырылды. Сот шешімдері әлі заңды күшіне енбегені хабарланады.
Еске сала кетейік, бұған дейін Жоғары аудит палатасының төрағасы Әлихан Смайылов «Қазақстан темір жолы» компаниясының ауыр жағдайы туралы айтып берген еді. Оның сөзінше, КТЖ тиімсіз және консервативті басқару салдарынан банкроттық алдында тұр.