Астана қаласы бойынша Бәсекелестікті қорғау және дамыту агенттігінің (БҚДА) Департаменті «ҰК «Қазақстан темiр жолы» АҚ (ҚТЖ) - «KTZ EXPRESS» АҚ еншілес ұйымының монополиялық жоғары бағалар белгілеу фактілерін анықтады.
Ведомствоның баспасөз қызметінің мәліметінше, компания 2021 жылы әскери тасымалдар үшін көліктік-экспедиторлық қызметтерге бағаны негізсіз көтерген.
Белгілі болғандай, кәсіпорын белгілеген экспедиторлық комиссиялар рұқсат етілген нормалардан асып, ел аумағы бойынша тасымалдардың өзіндік құнының 30% -на жеткен.
Нәтижесінде, мамандандырылған ауданаралық әкімшілік құқық бұзушылықтар жөніндегі сот «KTZ EXPRESS» АҚ-ға 853 379 теңге мөлшерінде айыппұл салып, 10 114 304 теңге мөлшеріндегі монополиялық кірісті тәркілеуді тағайындады.
Еске сала кетейік, өткен жылдың қазан айында «ҰК «ҚТЖ» АҚ астаналық филиалы – «Автоматтандыру және цифрландыру дирекциясында» тексерулер барысында қызметкерлердің жұмыс істеуінің формальды фактілері анықталды. «Өлі жандар» салдарынан компанияға келтірілген залал 21 млн теңгені құрады. Сол кезде ҚТЖ зардап шеккен тарап ретінде танылды.