Көлік полициясы департаментінің бастығы Бақытжан Малыбаев Қазақстанда жүк пойыздарынан Жапония мен Үндістанға экспорттауға арналған ферроқорытпалардың ұрланғанын айтты.
Ведомство баспасөз қызметінің мәліметінше, келтірілген залал сомасы 370 млн теңгеден асқан.
«Бас көлік прокуратурасының үйлестіруімен көлік полициясы департаменті жүргізген жан-жақты тергеулердің арқасында Семей және Аягөз станциялары арасындағы учаскеде жүк пойыздарынан ферроқорытпаларды бірнеше рет ұрлаған топтың қылмыстық әрекетіне жол берілмеді», - делінген хабарламада.
Жүк Қытай арқылы транзитпен Жапония мен Үндістанға жіберілген, ол «ТНК «Қазхром» АҚ құрамына кіретін Ақсу ферроқорытпа зауытына тиесілі болғаны хабарланады.
Абай облысы Жарма аудандық сотының шешімімен сотталушылар кінәлі деп танылып, 5 жылдан 6 жылға дейінгі мерзімге бас бостандығынан айыру жазасына кесілді.