Аудиттен кейін Жоғары аудиторлық палата (ЖАП) құрылыстағы баға белгілеуді жетілдіруге, нормативтік-техникалық базаны жаңартуға және мемлекеттік шығыстардың тиімділігін арттыруға бағытталған кешенді шаралар қабылдады.
АУДИТТЕН КЕЙІН ҚАНДАЙ ШАРАЛАР ҚАБЫЛДАНДЫ
Құрылыс ресурстарына бағалардың дұрыстығын арттыру үшін өнеркәсіп және құрылыс министрлігі (ӨҚМ) мен қаржы министрлігі мемлекеттік кіріс органдарының растайтын мәліметтерді ұсыну тәртібін регламенттейтін бірлескен бұйрық қабылдады.
Осыдан кейін ӨҚМ ішкі нарыққа құрылыс ресурстарын жеткізетін сыртқы экономикалық қызметке қатысушылар туралы ақпаратты ала бастады. Сондай-ақ ведомство өндірушілердің, жеткізушілердің және құрылыс компанияларының электрондық шот-фактураларынан мәліметтер алады.
БАҒА МОНИТОРИНГІ ҚАЛАЙ ӨЗГЕРДІ
2026 жылғы 1 шілдеден бастап ӨҚМ Құрылыс материалдарын, бұйымдарын, конструкцияларын және жабдықтарын өндіретін және жеткізетін кәсіпкерлік субъектілерінің тізбесін қалыптастыру және жүргізу қағидаларын бекітті.
Мұндай компаниялар құрылыс саласындағы бағалар мониторингі үшін ведомствоға тікелей ақпарат ұсынуға міндетті.
ЖОБАЛАРДАҒЫ АВТОРЛЫҚ ҚҰҚЫҚТАРДА НЕ ӨЗГЕРДІ
Жеке бағыт ретінде Мемлекеттік құрылыс жобалары банкінде орналастырылған жобаларға авторлық құқық мәселесін реттеу айқындалды. Дайын жобалық-сметалық құжаттаманы қайта қолдану мүмкіндігі жобалау мерзімдері мен құнын қысқартуға мүмкіндік береді.
«Мемсараптама» РМК және оның филиалдарымен бірлесіп 921 жоба бойынша кеңестер өткізілді. Олардың қорытындысы бойынша 917 авторлық шартқа қол қойылды, ал 4 жоба бойынша қаржыландыру көзінің өзгеруіне байланысты қол қою қажет болмады.
2026 жылғы 1 шілдеден бастап Құрылыс кодексіне енгізілген түзетулер де күшіне енді, оған сәйкес мемлекеттік инвестициялар есебінен жасалған сәулет және қала құрылысы туындыларына мүліктік құқықтар уәкілетті органға және мемлекеттік сараптама ұйымына тиесілі. Мұндай жобалар авторлық шарттарға қол қойылмай-ақ жобалар банкіне автоматты түрде түседі.
САЛАЛЫҚ КАТАЛОГТАРДАН ҚАНДАЙ ҚҰЖАТТАР АЛЫП ТАСТАЛДЫ
Жаңа редакцияда Сәулеттік, қала құрылысы және құрылыс каталогтарын қалыптастыру және жүргізу қағидалары бекітілді. Қосымша «ҚазҒЗИСА» АҚ-мен бірлесіп қолданыстағы каталогтарға енгізілген нормативтік-техникалық құжаттардың өзектілігіне талдау жүргізілді.
20 жылдан астам уақыт бұрын әзірленген және энергетиканы, өрт қауіпсіздігін, жол құрылысын, авиацияны, телекоммуникацияларды және басқа да салаларды қамтитын 455 құжаттың ішінен 386 ескірген құжат алып тасталды. Тағы 69 құжат қолданыстағы және баламасы жоқ құжаттар ретінде сақталды.
