Үкімет Жер кодексіндегі бұрын Жоғары аудит палатасы (ЖАП) анықтаған қайшылықты жойды.
ЖАП баспасөз қызметінің мәліметінше, заңнамаға өзгерістер енгізіліп, жер ресурстарына билік ету саласындағы өкілеттіктердің бөлінуі бекітілді.
Хабарланғандай, аудиторлар жер ресурстарын басқару тиімділігінің мемлекеттік аудиті барысында, оларды пайдалану, қорғау және картография мәселелерін қоса алғанда, нормалардың сәйкессіздігін анықтады.
Атап өтілгендей, Жер кодексінің 14-1-бабы жергілікті атқарушы органдарға жаңартылатын энергия (ЖЭ) объектілерін, индустриялық-инновациялық және басым инвестициялық жобаларды салу үшін жер беру туралы ұсыныстар мен шешімдер жобаларын дайындау өкілеттігін берген.
Сонымен қатар, 16-бап әкімдіктердің мұндай өкілеттіктерін жоққа шығарған, бұл құқықтық белгісіздік тудырған.
ЖАП үкіметке қайшылықты жоюды ұсынды. Нәтижесінде 17 шілдеде «ҚР кейбір заңнамалық актілеріне елорда мен республикалық маңызы бар қалалардың дамуы, ұлттық жобалар, кәсіпкерлік мәселелері және мемлекеттік органдардың функцияларын оңтайландыру бойынша өзгерістер мен толықтырулар енгізу туралы» заң қабылданды.
Осы заңға сәйкес, 14-1-баптан облыстық әкімдіктердің ЖЭ объектілері, индустриялық-инновациялық және басым инвестициялық жобалар үшін жер беру туралы ұсыныстар мен шешімдер жобаларын дайындау өкілеттігі алынып тасталды.
Еске сала кетейік, бұған дейін ЖАП ғылымды дамытуға бөлінген бюджет қаражатын пайдаланудың мемлекеттік аудитінің қорытындысын шығарды. Тексеру қаржыландырудың 219 млрд теңгеге дейін өсуі кезінде ғылыми-зерттеу және тәжірибелік-конструкторлық жұмыстарға (FЗТКЖ) жұмсалатын шығындар үлесі күтілетін көрсеткіштерден төмен болып қалып отырғанын, ал ғылыми әзірлемелерді экономикаға енгізу жеткілікті түрде белсенді емес екенін көрсетті.