В Түркістан облысында ветеринария саласында бюджет қаражатын 928 млн теңге сомасында иемдену схемасы анықталды. Бұзушылықтар «Ветеринариялық қызмет» шаруашылық жүргізу құқығындағы мемлекеттік коммуналдық кәсіпорнында (ШЖҚ МКК) анықталды.
СХЕМА ҚАЛАЙ ЖҰМЫС ІСТЕДІ
Тергеу 2022–2025 жылдар аралығында кәсіпорын басшылары мен жауапты қызметкерлерінің төлем тапсырмаларына әдейі жалған мәліметтер енгізгенін анықтады. Бұл тауарлар мен қызметтерді сатып алу кезінде бюджет қаражатын негізсіз аударуға мүмкіндік берген.
Операцияларды жүргізу үшін жеке электронды цифрлық қолтаңбалар (ЭЦҚ) пайдаланылған. Бұл ретте құжаттарда бірдей кәсіпкерлік субъектілерінің ЖСН-і көрсетіліп, олардың атаулары өзгертілген.
Іс жүзінде қызметтер көрсетілмеген, ал тауарлар жеткізілмеген.
ҚЫЛМЫСТЫҚ ІС ЖӘНЕ КҮДІКТІЛЕР
Осы факт бойынша материалдар ҚР ҚК 189-бабының 4-бөлігі («Сеніп тапсырылған бөтен мүлікті иемдену немесе ысырап ету») бойынша Сотқа дейінгі тергеп-тексерудің бірыңғай тізіліміне (СДТБТ) енгізілген.
26 наурызда төрт лауазымды тұлға — кәсіпорынның екі бұрынғы басшысы, орынбасары және бас бухгалтері — күдікті деп танылып, қамауға алынды.
Қазіргі уақытта басқа лауазымды тұлғалардың қатыстылығын анықтауға бағытталған тергеу әрекеттері жүргізілуде. Өзге ақпарат ҚР ҚПК-нің 201-бабына сәйкес жария етілмейді.
Бұған дейін Түркістан облысында ветеринария саласындағы бұзушылықтарға қатысты іс қаралған болатын. Түркістан қалалық соты мал шаруашылығын дамытуға бөлінген 271 млн теңгені иемденген бір топ адамды кінәлі деп таныды.