Прокуратура Батыс Қазақстан облысы Сырым ауданының прокуратурасы жол құрылысы кезінде бұрынғы тұрғын үй-коммуналдық шаруашылық (ТҮКШ), жолаушылар көлігі және автомобиль жолдары бөлімінің басшысы жіберген бұзушылықтарды анықтады.
Ведомство баспасөз қызметінің мәліметінше, бұрынғы басшы қызметтік өкілеттігін теріс пайдаланып, заңсыз әрекеттер жасаған, нәтижесінде мемлекетке 56 млн теңгеден астам шығын келтірілген.
Аудандық сот оны кінәлі деп танып, 3 жыл 6 ай бас бостандығын шектеу жазасын тағайындады. Үкім заңды күшіне енді.
Бұл жағдай ТҮКШ саласындағы өкілеттікті теріс пайдалану фактілері өзекті мәселе болып қала беретінін көрсетеді. Еске салайық, бұған дейін СҚО-да Тайынша ауданы ТҮКШ бөлімінің басшысына үкім шығарылған болатын. Ол 15,9 млн теңге бюджет қаражатын жымқырғаны үшін кінәлі деп танылды.
Басшы Тайынша қаласының әлеуметтік маңызы бар объектілерін жылумен қамтамасыз ету үшін модульдік құбыр желісін сатып алуға кәсіпкермен жалған мемлекеттік сатып алу шартын жасасқаны хабарланды.