Сәтбаев қалалық соты «Қазақмыс Корпорациясы» ЖШС-ке тиесілі жеке қорғаныс құралдарын ұрлау ісі бойынша мердігер ұйымның қызметкерін кінәлі деп таныды. Компанияның деректері бойынша, келтірілген залал 2 131 426 теңгені құрады.
БҰЗУШЫЛЫҚ ҚАЛАЙ АНЫҚТАЛДЫ
Ұрлық фактісін «Қазақмыс Корпорациясы» ЖШС-тің қауіпсіздік қызметі ішкі тексеру барысында анықтады. Мердігер ұйымның №67 «Батыс» кен орнында қойма меңгерушісі болып жұмыс істеген қызметкері жалған жүкқұжатты пайдаланып, Ultra-210 маркалы респираторларды ұрлағаны анықталды.
Келтірілген залалдың жалпы сомасы 2 131 426 теңгені құрады.
ТЕРГЕУ ҚАЛАЙ ЖҮРГІЗІЛДІ
Ішкі тексеру материалдары құқық қорғау органдарына берілді. Сотқа дейінгі тергеу барысында айыпталушы кінәсін толық мойындап, компанияға келтірілген материалдық залалды толық көлемде өтеп, кінәсін мойындау туралы іс жүргізу келісімін жасасты.
СОТ ҚАНДАЙ ШЕШІМ ШЫҒАРДЫ
Сәтбаев қалалық соты қылмыстық істі қарап, айыпталушыны кінәлі деп таныды.
Сот пробациялық бақылау белгілей отырып, 3 жыл бас бостандығын шектеу түріндегі жаза тағайындады.
Сонымен қатар, сотталған адам заңнамада көзделген міндетті төлемді Жәбірленушілерге өтемақы төлеу қорына аударуға міндеттелді. Алынған мүлік заңды иесіне қайтарылды.
КОМПАНИЯДА НЕ ДЕДІ
«Қазақмыс Корпорациясы» ЖШС-те корпоративтік активтерді қорғау, заңдылықты сақтау және өндірістік процестердің ашықтығын қамтамасыз ету корпоративтік саясаттың бөлігі екенін хабарлады.
Компанияда құқыққа қайшы әрекеттер анықталған кезде материалдар құзыретті мемлекеттік органдарға берілетіні, ал кінәлі тұлғалар ҚР заңнамасына сәйкес жауапкершілікке тартылатыны да мәлімделді.
