ҰҚК қызметкерлері Жетісу облысының «Алтынкөл» өткізу пунктінде 80 мың ампула дәрі-дәрмекті заңсыз әкелу әрекетін анықтады.
«2024 жылғы 16 тамызда ҰҚК шекара қызметі Жетісу облысының «Алтынкөл» теміржол өткізу пунктінде ірі партия дәрі-дәрмекті тасымалдау әрекетінің жолы кесілді», - деп хабарлады ведомствоның баспасөз қызметі.
Шығу тегі белгісіз, ілеспе құжаттары жоқ дәрілік заттар теміржол контейнерінен табылғаны айтылады.
«Жүк процестік шешім қабылдау үшін облыстың экономикалық тергеу департаментіне берілді», - деп мәлімдеді ведомствода.
Еске салайық, бұған дейін Астанада елордалық халықаралық әуежайдағы кеден бекеті басшысының орынбасарына үкім шығарылған болатын. Ол декларацияланбаған алтын бұйымдары мен медициналық дәрі-дәрмектерді әкелгені үшін сотталған азаматшадан пара алуда айыпталған еді.