Ауыл шаруашылығы министрлігі мал шаруашылығы өнімдерін қадағалаудың жаңа әдістерін қолданбақшы.
«Малдарды сойысқа дейінгі ветеринариялық тексерусіз және союдан кейінгі ұшалар мен мүшелерге ветеринариялық-санитариялық сараптама жүргізбей өткізуге жол бермеу мақсатында ведомство «Еттің ветеринариялық-санитариялық сараптамасы» модулін әзірледі», - деп хабарлады министрліктің баспасөз қызметі.
Белгілі болғандай, жүйе сою объектілері мен ішкі сауда орындарында ветеринариялық-санитариялық сараптама жүргізілгеннен кейін оның актісін автоматты түрде алуға мүмкіндік береді. Сондай-ақ жоба аясында жануардың толық өмірлік циклі туралы ақпараты бар QR-кодтарды енгізу қарастырылған. Бұл малдарды ветеринариялық тексерусіз және ұшалар мен мүшелеріне сараптама жүргізбей союдың алдын алады деп күтілуде.
«Қазіргі уақытта жоба іске қосылып, республикалық маңызы бар барлық өңірлер мен қалаларда жүзеге асырылуда. Оған 1664 сою объектісі, ветеринариялық-санитариялық сараптама зертханалары, сауда объектілері қосылған. Жүйеде 1470-тен астам ветеринариялық дәрігер, ВССЗ зертхана қызметкерлері және мемлекеттік ветеринариялық-санитариялық инспекторлар тіркелген. QR-код арқылы 117 мыңнан астам ветеринариялық анықтама және 438 мың сараптама актісі ресімделді», - делінген хабарламада.
Сонымен қатар, жүйе Ресей Федерациясымен шектесетін «Шарбақты» ветеринариялық бақылау бекетінде сәтті сынақтан өткені айтылады.