Павлодар қылмыстық істер жөніндегі ауданаралық сотында «TAKORP» қаржы пирамидасын басқарғаны және оны бұқаралық ақпарат құралдары арқылы жарнамалағаны үшін екі азаматқа үкім шығарылды.
Өңір соттарының баспасөз қызметінің мәліметінше, өткен жылдың қаңтарында фигуранттардың бірі қаржылық пирамиданың құрылымдық бөлімшесінің қызметін ұйымдастыру жоспарын әзірлеген. Жоба салымшыларды АҚШ-та орналасқан және жарнамалық технологиялар саласында жұмыс істейтін инвестициялық платформа ретінде тартқан.
Бұған дейін хабарланғандай, тіркелу үшін қатысушыларға «ОКХ» электронды криптобиржасы арқылы криптовалюта сатып алу ұсынылған. Негізгі шарттардың бірі – құнды жүлдені ұтып алу мүмкіндігімен сәттілік дөңгелегіне қатысуға кепілдік беретін кемінде бес жаңа салымшыны тарту.
Пирамидаға 50-ден астам азамат деңгейіне қарай $30-дан $500-ге дейін инвестиция салып, $2 мыңға дейін бонус алуға үміттенгені атап өтілді. Салынған қаражаттың жалпы сомасы 58 млн теңгеден асқан.
Нәтижесінде сот айыпталушыларды кінәлі деп танып, олардың біреуіне 6 жыл бас бостандығынан айыру жазасын тағайындады. Істің екінші фигуранты 1 жыл 6 ай бас бостандығынан айыру жазасын алды. Сотталғандар ең төменгі қауіпсіздіктегі қылмыстық-атқару жүйесі мекемесінде жазасын өтейтін болады.
Жәбірленушілердің 58 млн теңге сомасындағы азаматтық талаптары толық көлемде қанағаттандырылды.