Шымкент қаласындағы Қаржылық мониторинг агенттігінің (ҚМА) Департаменті заңсыз онлайн ойын бизнесін ұйымдастырды деген күдікке ілінген адамдар тобының қызметін тоқтатты.
Ведомствоның баспасөз қызметінің мәліметінше, күдіктілер екі жыл бойы TikTok және YouTube платформаларында «TauBrat» парақшасы арқылы тікелей эфирде заңсыз «Тринька» құмар ойынын өткізген.
Қылмыстық кірістерді заңдастыру үшін «дроптар» деп аталатындарды тарту схемасы қолданылған — банк карталары жалған адамдарға ресімделіп, олар арқылы ақша қаражаты қолма-қол алынған.
Заңсыз қызметтен түскен жалпы кіріс 93 млн теңгеден асқан. Алынған қаражатқа күдіктілер Hyundai Sonata көлігін, сондай-ақ жер телімі бар тұрғын үйді сатып алған.
Соттың санкциясымен аталған мүлікке тыйым салынды. Екі күдікті екі ай мерзімге қамауға алынды.
Еске сала кетейік, бұған дейін ҚМА қызметкерлері анықтаған ірі трансшекаралық аударымдар схемасы бойынша ақша қаражаты төлем ұйымдары арқылы өтіп, заңды операциялар ретінде бүркемеленіп, онлайн-казино пайдасына шығарылған. Заңсыз аударымдар көлемі 600 млрд теңгеден асқан.
Сонымен қатар ҚМА төрт онлайн-казиноны техникалық қолдауды және ақша қаражатымен операциялар бойынша кеңес беруді қамтамасыз еткен call-орталықтың қызметін тоқтатты.
Оның жұмысына Қазақстан, Ресей, Беларусь, Испания және Вьетнам азаматтары болған 120 адам қатысқан. Сонымен қатар, call-орталықты ұйымдастырушылар криптовалютада қаражат қабылдау және шығару үшін гемблингтік серіктестік бағдарламасын құрған. Бұл бағдарламаның айналымы 200 млн USDT (100,8 млрд теңгеден) асқан.