Шымкентте «Nazira Gold» қаржы пирамидасын құру және басқару айыбы бойынша сотталушы тоғыз адамға үкім шығарылды. Тергеуді Шымкент Қаржылық мониторинг агенттігінің (ҚМА) департаменті жүргізді.
Ведомство баспасөз қызметінің мәліметінше, ұйымдастырушылар «Nazira Gold» компаниясын зергерлік бұйымдар компаниясы ретінде таныстырған. Салымшыларға салынған қаражаттың 20%-дан 40%-ға дейін ай сайынғы табыс уәде етілген.
Шын мәнінде, қатысушыларға төлемдер зергерлік бұйымдар саудасынан түскен пайда есебінен емес, жаңа салымшылардың қаражаты есебінен жүзеге асырылған.
Қаржы пирамидасына 4 мыңнан астам салымшы тартылған. Алынған қаражаттың бір бөлігін ұйымдастырушылар қымбат автокөліктер, жер учаскелері және жылжымайтын мүлік сатып алуға жұмсаған.
Нәтижесінде сот тоғыз айыпталушыны кінәлі деп танып, оларға бес жылдан он жылға дейінгі мерзімге бас бостандығынан айыру жазасын тағайындады.
Сонымен қатар сот сотталғандардан 402 млн теңге, 52 көлік құралы, жеке тұрғын үйді, беделді тұрғын кешендердегі екі пәтерді және шамамен 17 келі зергерлік бұйымдарды тәркілеу туралы шешім шығарды.