Бәсекелестікті қорғау және дамыту агенттігі (БҚДА) "HILL Corporation" ЖШС мен "ҚТЖ-Жүк тасымалы" ЖШС арасында бәсекелестікке қарсы келісімді анықтады.
"ҚТЖ-ЖТ локомотивтерге арналған мотор майларын сатып алу кезінде әлеуетті жеткізушілерге оларды сатып алуға қатысудан шеттету мақсатында кемсітушілік жағдайлар қолданды. Осылайша, бастапқыда ҚТЖ-ЖТ әрекеттері HILL Corporation мүддесіне жасалды", - деп хабарлады БҚДА баспасөз қызметі.
Анықталған бәсекелестікке қарсы келісімнің сомасы 12 млрд теңгеден асты.
Компания БҚДА тергеу нәтижелерін сотта шағымдануға тырысқаны атап өтілді. Алайда Жоғарғы Соттың қаулысы негізінде "HILL Corporation" ЖШС және "ҚТЖ-Жүк тасымалы" ЖШС-ге қатысты тергеу нәтижелерінің заңдылығын танитын жергілікті соттардың шешімдері заңды күшіне енді.
Еске сала кетейік, бұған дейін БҚДА-ның Астана қаласы бойынша департаменті "ҚТЖ" ҰК" АҚ (Қазақстан темір жолы) еншілес ұйымы - "KTZ EXPRESS" АҚ-ның монополиялық жоғары бағалар белгілеу фактілерін анықтады. Компания 2021 жылы әскери тасымалдарға арналған көлік-экспедиторлық қызметтердің бағасын көтеріп жібергені хабарланды.