Көлік министрлігінде теміржол жолаушылар тасымалының проблемалық мәселелері бойынша кеңес өтті.
Антикор баспасөз қызметінің мәліметінше, іс-шараға ведомство, көлік министрлігі, теміржол және су көлігі комитеттерінің, санитариялық-эпидемиологиялық бақылаудың, "Ұлттық компания "Қазақстан темір жолы" АҚ (ҚТЖ) және "Әлеуметтік маңызы бар қатынастар бойынша теміржол көлігімен тасымалдаушылар қауымдастығы" өкілдері қатысты.
Кездесуде жолаушылар тасымалын субсидиялау жүйесіндегі бұзушылықтар талқыланды.
"Мемлекеттік қолдау есебінен айтарлықтай кірістеріне қарамастан, көрсетілетін қызметтердің тиісті сапасын қамтамасыз етпейтін жекелеген жеке тасымалдаушылардың мәселелеріне ерекше назар аударылды. Бұл вагондардың санитариялық және техникалық жай-күйіне жолаушылардың көптеген шағымдарына әкеп соғады", - делінген хабарламада.
Сонымен қатар, билеттердің тапшылығы және пойыздардың тұрақты кешігуі сияқты мәселелер атап өтілді. Антикор бұзушылықтарды жою бойынша ұсынымдар енгізді.
"Кеңес қорытындысы бойынша Агенттік субсидияларды есептеу әдістемесін қайта қарауды, субсидиялау жүйесін цифрландыру, тиімді мониторинг пен бақылауды қамтамасыз ету (пойыздарды тексерудің аудио-бейнежазбасы, қызмет көрсету сапасын бағалау өлшемшарттары мен айыппұл санкциялары жүйесін белгілеу) мәселелерін пысықтауды, тасымалдаушы компанияларда аудит жүргізуді, сондай-ақ жаңа вагондар үлесін арттыруды ұсынды", - делінген хабарламада.
Еске сала кетейік, мамыр айында Бейімбет Майлин аудандық соты Қостанай облысындағы ҚТЖ лауазымды тұлғаларына қатысты үкім шығарды. Олар дизель отынын және теміржол кранын жөндеуге бөлінген ақшаны жалпы сомасы 12 млн теңге ұрлағаны үшін кінәлі деп танылды.
Қараша айының басында хабарланғандай, Астанада "ҰК "ҚТЖ" АҚ автоматтандыру және цифрландыру дирекциясының бұрынғы басшысына қатысты үкім шығарылды. Ол өзі және басқа адамдар үшін пайда мен артықшылықтар алу мақсатында қызметтік өкілеттіктерді пайдаланды, бұл ұйым үшін ауыр зардаптарға әкеп соқты (ҚР ҚК 361-бабы 4-бөлігінің 3-тармағы).
Кейінірек Ақтөбе облысында сотталды "ҚТЖ-Жүк тасымалы" ЖШС "Батыс" филиалының Жем эксплуатациялық локомотив депосының бастығы және оның бағыныштысы. Ол делдал – локомотив депосының кадрлар жөніндегі менеджері арқылы 1,5 млн теңге көлемінде пара алғаны үшін кінәлі деп танылды.