Астанада бюджеттен білім беру саласына 365 млрд теңге бөлу жоспарлануда, бұл қаражат балабақшаларда, мектептерде, колледждерде және университеттерде оқытуға жұмсалады.
bes.media мәліметінше, тиісті жоба «Ашық НҚА» сайтында жарияланды, алайда оны Мәслихат әлі бекіткен жоқ.
Астана мектептерінде оқытуға барлығы 38,4 млрд теңге, ал оқушыларды жан басына қаржыландыруға 83,8 млрд теңге бөлу ұсынылып отыр.
Сонымен қатар, арнайы білім беру бағдарламалары бойынша оқытуға 3,7 млрд теңге, арнайы білім беру ұйымдарындағы дарынды балаларға 3,8 млрд теңге, оқулықтарды сатып алу және жеткізуге 4 млрд теңге бөлінбек.
«Жайлы мектеп» жобасы аясындағы құрылысқа 125,8 млрд теңге бөлінеді. Сонымен бірге, қаладағы балабақшаларға 45,3 млрд теңге жұмсау жоспарланғаны белгілі болды.
Сондай-ақ, мамандар даярлауға ақша бөлу көзделуде. Қаражатты былай бөлу туралы шешім қабылданды:
- техникалық және кәсіптік білім беру ұйымдарында мамандар даярлау 19,6 млрд теңге;
- жоғары, жоғары оқу орнынан кейінгі білімі бар мамандар даярлау және білім алушыларға әлеуметтік қолдау көрсету 3,3 млрд теңге;
- техникалық және кәсіптік, орта білімнен кейінгі білім беру ұйымдарында мамандар даярлау 504 млн теңге.
Сонымен қатар, жобада жоғары жұмыс көрсеткіштері үшін мемлекеттік білім беру мекемелеріне гранттар беруге 27 млн теңге қарастырылған.
Бұдан басқа, дамуында проблемалары бар балаларды оңалту және әлеуметтік бейімдеуге 1,4 млрд теңге, балалардың психикалық денсаулығын тексеруге және психологиялық-педагогикалық көмек көрсетуге 585 млн теңге қарастырылған.
Сонымен бірге, олимпиадалар мен спорттық іс-шараларды қаржыландыру көзделуде. Астанада мектеп олимпиадаларын, мектептен тыс іс-шаралар мен байқауларды өткізуге 236 млн теңге, балалар мен жасөспірімдердің спорт бойынша қосымша білім алуына 14,2 млрд теңге, әдістемелік жұмысқа 857 млн теңге бөлу жоспарлануда.
Сонымен қатар, бюджетте жетім балалардың қамқоршыларына ай сайынғы төлемдерге 233 млн теңге, сондай-ақ біржолғы төлемдерге 11 млн теңге қарастырылған.