Павлодар облысында 14 мың бала мен жасөспірім Artsport бағдарламасы бойынша спорт секцияларында тегін айналысады. Биыл өңірде бұған 3 млрд теңгеге жуық қаражат бөлінді. Бағдарламаға 20-дан астам спорт түрі енгізілген, оның ішінде мүгедектігі бар балалар айналыса алатын секциялар да бар.
pavon.kz деректері бойынша, қазіргі уақытта облыста Artsport бағдарламасы бойынша спортпен айналысуға кезекте 6 мыңнан астам бала тұр.
«Өткен жылы 1,9 млрд сома бөлінсе, биыл 2,7 млрд теңге бөлінді. Қазір 14 мыңға жуық бала айналысады. Тағы 6-8 мыңға жуығы кезекте тұр. Оның үстіне, өткен жылы бізде 81 жеткізуші болса, қазір 118», — деді өңірлік дене шынықтыру және спорт басқармасы басшысының орынбасары Нұрлан Есембаев.
Бағдарлама аясында көбірек баланы қамту үшін тек бір үйірмеге ғана баруға рұқсат етілгені хабарланды. Айта кетейік, бастапқыда екі үйірмеге баруға болатын.
«Кейбір балаларға екі ваучер берілгенімен, олар тек бір үйірмеге ғана қатысқан жағдайлар болды. Нәтижесінде екінші орын бос қалады, ал басқа бала жобаға қатыса алмайды», — деп түсіндірді Нұрлан Есембаев.
Еске салайық, біз бұған дейін Artsport бағдарламасы және оған қатысты бұзушылықтар туралы жазған болатынбыз. Мәселен, Шымкентте Artsport бағдарламасы бойынша 56 млн теңгеден астам сомаға бұзушылықтар анықталған еді.
2022 жылдың соңында Бас прокуратура бірнеше өңірде жалпы сомасы 1,1 млрд теңгеге қаражат ұрланғаны туралы хабарлады. Сондай-ақ, Қазақстанның алты өңірінде Artsport бағдарламасы бойынша балаларды бұрынғы сутенерлер мен секс-қызметкерлер жаттықтырғаны белгілі болды.
Биыл Павлодар облысында сыбайлас жемқорлық жанжалдары болмайды деп үміттену ғана қалады. Айта кетейік, биыл Artsport бағдарламасына қаражат тек 5 өңірге бөлінді: Павлодар, Түркістан (2,1 млрд), Қарағанды (2,2 млрд) және Маңғыстау облыстарына (1,3 млрд), сондай-ақ Абай облысына (1,2 млрд).
Мүмкін, өткен жанжалдардан кейін елде платформаның орнына ұқсас әлеуметтік қызметтері бар жаңа DAMU BALA іске қосылғандықтан шығар.