Ақтөбе облысында мемлекетке қайтарылған активтер есебінен 12 әлеуметтік нысанның құрылысы жүзеге асырылуда.
Өңір прокуратурасының баспасөз қызметінің мәліметінше, ауылдық медицинаға ерекше көңіл бөлінуде. Осылайша, Алға ауданының Маржанбұлақ ауылында жаңа медициналық пункттің құрылысы басталып, бұл жергілікті тұрғындарды облыс орталығына бармай-ақ қажетті медициналық көмекпен қамтамасыз етуге мүмкіндік береді деп күтілуде.
Сонымен қатар, облыстың тағы 10 ауылында жаңа медициналық мекемелер салынуда. Бұл ауылдық жерлерде медициналық қызметтерге қолжетімділікті айтарлықтай кеңейтеді деп болжануда. Барлық нысандарды ағымдағы жылдың соңына дейін аяқтау жоспарлануда.
Жалпы ел бойынша прокуратура органдары мемлекетке қайтарған активтер есебінен 333 әлеуметтік жоба жүзеге асырылуда.
Еске салайық, Қазақстанға активтерді заңсыз шығарумен күрес аясында қайтарылған қаражат Арнайы мемлекеттік қорға аударылып, одан мектептер, ауруханалар салу және инфрақұрылымды жаңғыртуды қамтитын әлеуметтік қажеттіліктерге жұмсалады.
Қаңтар айында хабарланғандай, қайтарылған активтер есебінен Алматы облысы Кеген ауданының Жалағаш ауылында құны 1,1 млрд теңге болатын спорт кешенін салу жоспарлануда.
Ақпан айының басында үкімет қордан Ұлытау облысы Қаражал қаласында мектеп салуға 1,4 млрд теңгеден астам қаражат бөлді. Кейін Жетісу облысы Кербұлақ ауданының Көксай ауылында мектеп салуға тағы 1,4 млрд теңге бөлінгені белгілі болды.
Сондай-ақ, қордан Семейде Арнаулы әлеуметтік қызметтер көрсету орталығын салуға 2,6 млрд теңге бөлінді. Қаржыландырылатын жобалар тізбесіне Астанадағы Қажымұқан Мұңайтпасов атындағы стадионның құрылысы енгізілді.
Наурыз айының басында үкімет Қызылорда облысы Арал ауданында сумен жабдықтау жүйелерін салу және жаңғыртуға Арнайы мемлекеттік қордан шамамен 4,2 млрд теңге бағыттады.
Сәуірде үкімет Акмола облысының Көкшетау және Макинск қалаларының тұрғындарын сумен қамтамасыз ету үшін Арнайы мемлекеттік қордан 1 млрд теңге бөлуге шешім қабылдады.
Мамырда үкімет Жамбыл облысының Қордай және Талас аудандарында екі дәрігерлік амбулаторияның құрылысын аяқтауға қордан 319,5 млн теңге бөлуді шешті.
Маусымда Қостанай облысының тұрғындарын сапалы ауыз сумен қамтамасыз ету үшін Арнайы мемлекеттік қордан шамамен 5,4 млрд теңге бөлінді.