Әлеуметтік желіде Ақмола облысының әкімі Марат Ахметжановтың шағын ауылға арналған «тым қымбат» спорт кешені туралы сұраққа жауап берген бейнежазбасы белсенді таралуда.
«blog_erzhana» Instagram-парақшасының мәліметінше, сұхбаттың бірінде журналист өңір басшысынан Степногорск қаласындағы Қырыққұдық ауылына (халық саны шамамен 500 адам) 350 млн теңге тұратын спорт кешенін не үшін салып жатқанын сұраған.
Сұхбат беруші мұндай нысанның аз ғана тұрғынға «тым қымбат» емес пе екенін білгісі келген. Өз кезегінде Ахметжанов әрбір ауылда осындай спорт кешені болғанын қалайтынын атап өткен.
«Ал, 500 адам — адам емес пе? Осындай кешендерді тағы салуға мүмкіндік болса — мен тек қолдаймын. Және міндетті түрде қолдау көрсетемін», — деп жауап берген әкім.
Ахметжановтың сөзі әлеуметтік желілерде тез таралып, пайдаланушылар оны белсенді түрде қолдады.
Еске сала кетейік, наурыз айында хабарланғандай, жаңа кешенде баскетбол, волейбол, футбол алаңдары бар спорт залы, 100 орындық акт залы, кітапхана, киім ауыстыратын бөлме, сондай-ақ әртүрлі үйірмелер өткізуге арналған төрт кабинет орналасады.