Ұлытау облысында сыбайлас жемқорлыққа қарсы заңнаманы бұзғаны үшін мемлекеттік қызметші жұмыстан шығарылды.
Өңір прокуратурасы баспасөз қызметінің мәліметінше, Сәтбаев қаласы әкімдігінің бас маманы құмар ойындарға қатысып, сыбайлас жемқорлыққа қарсы шектеулерді жүйелі түрде бұзған.
«1XBET» және «OLIMPBET» букмекерлік компаниялары ұсынған ақпаратқа сәйкес, ол шамамен 16 млн теңге сомасына ставкалар жасаған.
Прокурорлық қадағалау актісін қарау нәтижесінде мемлекеттік қызметші лауазымынан босатылды.
«Қазақстан Республикасының «Сыбайлас жемқорлыққа қарсы іс-қимыл туралы» Заңына сәйкес, мемлекеттік қызметшілер бірқатар сыбайлас жемқорлыққа қарсы шектеулерді, оның ішінде телекоммуникациялық желілер мен интернет-ресурстарды пайдалана отырып өткізілетін құмар ойындар мен париге қатысуға тыйым салуды сақтауға міндетті», - деп қорытындылады ведомство.
Еске сала кетейік, наурыз айында Маңғыстау облысының мемлекеттік кірістер департаментінің қызметкері букмекерлік кеңседе ставка жасағаны үшін лауазымынан шеттетілген болатын.