Атырау облысында жергілікті тұрғын бопсалау үшін ұсталды.
polisia.kz мәліметінше, облыстық ПД ұйымдасқан қылмысқа қарсы күрес басқармасының қызметкерлері 1 млн теңге бопсалаған күдіктіні ұстады.
Белгілі болғандай, ер адам 27 жастағы азаматтан әлеуметтік желілерде жеке сипаттағы бейнежазбаны таратамын деп қорқытып, ақша талап еткен.
Нәтижесінде айыпталушы жәбірленушіден ақша сомасының бір бөлігін алған кезде ұсталды.
«Бопсалау фактісі бойынша қылмыстық іс қозғалды. Тергеу мүддесіне байланысты өзге ақпарат жарияланбайды», - делінген хабарламада.
Еске сала кетейік, бұған дейін Түркістан облысынан екі блогер бопсалауға күдіктеліп ұсталған еді. Олар аудандағы мектептердің бірінің директорынан оның іскерлік беделіне нұқсан келтіретін әлеуметтік желідегі жазбаны алып тастау үшін 100 мың теңге талап еткен.
Сонымен қатар, құқық қорғау органдары Семей қаласының алаяқтық үшін бірнеше рет сотталған тұрғынын ұстады. Ол бірнеше жыл бойы өзін "блогер" ретінде таныстырып, абыройды түсіретін бейнематериалдарды таратамын деп қорқытып, Семей арқылы өтетін жолаушылар пойыздарының қызметкерлерінен ақша бопсалаған деп күдіктеледі.