Экология және табиғи ресурстар министрі Ерлан Нысанбаев ведомствоның экологиялық жағдайды жақсарту, қалдықтарды басқару және биоәртүрлілікті сақтау жөніндегі жұмыс нәтижелері туралы хабарлады.
Үкіметтің баспасөз қызметінің деректері бойынша, ағымдағы жылдың қорытындысы бойынша ірі кәсіпорындардың нормативтік шығарындыларының көлемі 2022 жылмен салыстырғанда 148 мың тоннаға, яғни 7,2%-ға қысқарды. Бұл төмендеуге қолжетімді үздік технологияларды енгізу арқылы қол жеткізілгені айтылды.
Экологиялық жағдайды бақылау үшін автоматтандырылған мониторинг жүйелері енгізілуде. Қазіргі уақытта 78 кәсіпорынның 74-і нақты уақыт режимінде шығарындылар туралы деректерді жіберуде.
Министрдің айтуынша, Қазақстанда жыл сайын 4,5 млн тоннадан астам коммуналдық қалдықтар пайда болады. 2025 жылы оларды қайта өңдеу деңгейі 28,6%-ға дейін өсті.
«Қалдықтарды басқару саласында 63 жоба мақұлданды, оның 22-сі 89,4 млрд теңге сомасына қаржыландырылды. 2030 жылға қарай қайта өңдеу көрсеткішін 40%-ға жеткізуді жоспарлап отырмыз», — деді Ерлан Нысанбаев.
Сонымен қатар Астана, Алматы және Шымкентте үш қоқыс өртеу зауытын салу көзделген. Жалпы инвестиция көлемі 293 млрд теңгені құрайды.
Параллельді түрде рұқсат етілмеген қоқыс үйінділерін жою жұмыстары жалғасуда. Атап өтілгендей, ағымдағы жылы ғарыштық мониторинг көмегімен 3 827 осындай нысан анықталды, оның 3 464-і жойылды. 2018 жылмен салыстырғанда заңсыз полигондар саны 45%-ға қысқарды.
Еске сала кетейік, бұған дейін хабарланғандай, Абай облысы Жаңасемей ауданы Озерки ауылында 2023 жылы 8 млн теңгеге салынған қоқысты уақытша сақтау полигоны авариялық жағдайға келді. Жергілікті тұрғындардың айтуынша, қоршаулардың бір бөлігі құлап, қалдықтар бөлінген аумақтан әлдеқайда асып кеткен.