Солтүстік Қазақстан облысының тоғыз ауылдық округінің әкімдеріне жойылмаған қоқыс полигондары үшін айыппұл салынды. Өткен жылы өңірде барлығы 116 заңсыз қоқыс үйіндісі анықталды.
СҚО экология департаментіне сілтеме жасаған «Қазинформ» ХАА аудандық және қалалық әкімдіктерге тиісті хаттар жолдағанын хабарлайды.
«Бұзушылықтардың жалпы санынан тек 91%-ы жойылды. Шара қолданбаған тоғыз ауылдық округ әкіміне 221 мың теңгеден астам сомаға айыппұл салынды», - делінген хабарламада.
Мәселен, 2021 жылы Бескөл ауылдық округінде департамент 8 гектар алаңды алып жатқан заңсыз қоқыс үйіндісін анықтады. Нәтижесінде әкімге 87,5 мың теңге айыппұл салынды.
Сонымен қатар, СҚО мамандандырылған ауданаралық экономикалық соты әкімнің қоршаған ортаны қалпына келтіріп, қоқыс үйіндісін екі ай ішінде жоюы керек деп шешім қабылдады, алайда жергілікті билік тарапынан ешқандай әрекет жасалмады. Сот полигонды жою үшін ағымдағы жылдың 1 маусымына дейін жаңа мерзім белгіледі.
Сонымен қатар, Қызылжар ауданы Бәйтерек ауылы маңындағы қоқыс полигоны мәселесі шешілмей қалды. Мамандардың айтуынша, рұқсат етілмеген қоқыс үйіндісі Петропавл әуежайы аумағынан 13 км қашықтықта орналасқан.
«Қазақстан Республикасының әуе кеңістігін пайдалану және авиация қызметі туралы» Заңының 90-бабы 4-тармағына сәйкес, әуежайдан 13 шақырым радиусында қоқыс полигондарын орналастыруға тыйым салынады. Бұл қоқыс үйінділері құстардың көптеп жиналуына себеп болуы мүмкін, бұл әуе кемелері үшін қауіп төндіреді», - делінген хабарламада.
Естеріңізге сала кетейік, қаңтарда белгілі болғандай, қоқыс шығару жөніндегі жаңа елордалық оператор «Zero Waste» ЖШС экологиялық жанжалдың ортасында қалды. Компания қалалық қалдықтарды дайындалмаған карьерге шығару үшін делдалдар тізбегін пайдаланады, ал заңсыз қоқыс үйіндісі үшін жауапкершілік қоқыс шығаратын компанияға емес, жер учаскесінің иесіне жүктелгені хабарланған болатын.