Алматыда Қаржылық мониторинг агенттігінің (ҚМА) қызметкерлері «Boxy Wealth» қаржылық пирамидасының әрекетін тоқтатты.
Ведомствоның баспасөз қызметінің мәліметінше, ұйымдастырушылар өздерін инвестициялық компания ретінде таныстырып, азаматтарға жарнамалық материалдарды қарау деген желеумен тәулігіне 5%-дан 10%-ға дейін кіріс ұсынған. Айлық кіріс шамамен 150%, ал жылдық кіріс 1800%-дан астам болуы мүмкін деп көрсетілген.
Сонымен қатар, рефералдық жүйе жұмыс істеген: жаңа қатысушыларды тартқаны үшін олардың салымдарының 10% уәде етілген. Ақшаны жалған адамдарға ресімделген банк карталарына қабылдап, кейін криптовалюталық әмияндарға аударған.
Зардап шеккендер ретінде 180-нен астам адам танылды, шығын 230 млн теңгені құрады. Схеманың ұйымдастырушысы екі айға қамауға алынды, тергеу жалғасуда.