Қаржы мониторингі агенттігі (ҚМА) Бас прокуратураның үйлестіруімен тұтыну кооперативі ретінде жасырылған «Asar Baspana» қаржы пирамидасының қызметін жолын кесті.
ҚМА баспасөз қызметінің мәліметінше, қаржы пирамидасын ұйымдастырушылар салымшыларға жылжымайтын мүлік, көлік құралдары, сондай-ақ тұрмыстық өнімдерге (Биологиялық белсенді қоспалар, ас үй ыдыстары, косметика және басқа да тауарлар) ақша салуды ұсынған. Оның орнына олар салынған сомадан ай сайын 30% дейін пайда уәде еткен.
Компаниялардың кеңселерінде және күдіктілердің тұрғылықты жерлерінде жүргізілген тінту кезінде құқық қорғау органдары 1,2 млрд теңгеден астам және 13 автокөлікті тәркіледі.
Қаржы пирамидасының екі ұйымдастырушысы ұсталды. Сот санкциясымен олар 2 ай мерзімге қамауға алынды. Сотқа дейінгі тергеу жалғасуда.
Еске салайық, бұған дейін Астанада «LIVEGOOD» қаржы пирамидасын ұйымдастырудан түскен қылмыстық кірістерді жылыстату схемасы анықталған болатын. Белгілі болғандай, 2023 жылдан 2025 жылға дейін күдікті биологиялық белсенді қоспаларды (ББҚ) сату бойынша желілік маркетинг ретінде жасырылған қаржы пирамидасының филиалын басқарған.