Мақат ауданы әкімінің жұбайы (Атырау облысы) Ақмарал Өмбетқалиева күйеуі Ринат Ибрагимов оны 11 жыл бойы ұрып-соққанын және тіпті балаларын тартып алғанын мәлімдеді.
press.kz деректері бойынша, әйел 2023 жылдың мамыр айында Ибрагимовтың тағы да оған қол көтергенін айтады. Айта кетейік, ол – белгілі спортшы, дзюдошы, Бейжің және Лондон олимпиадаларына қатысқан.
«Ринат тағы да балаларымыздың көзінше мені тепкілеп, ұрып-соқты, әрі мені мүгедек етемін деп қорқытты. Соның салдарынан мен сегізкөз омыртқамды сындырып алып, бір ай бойы жүре алмадым. Осы кезеңде ол өзінің лауазымы мен байланыстарын пайдаланып, менің балаларымды заңсыз түрде тартып алды. Мен балаларымды бір жыл бойы көрмедім», - деді Өмбетқалиева.
Іс «Денсаулыққа қасақана орташа ауырлықтағы зиян келтіру» бабы бойынша сотқа берілгені хабарланды. Өз кезегінде Атырау облысының әкімдігі өз қызметкері туралы жаңалыққа реакция білдіріп, дзюдошы-шенеунікке қатысты қызметтік тексеру бастады.
«Бұған дейін азаматша Өмбетқалиева бізге өтініш білдірмеген еді. Ашылған жағдайларға байланысты қызметтік тексеру тағайындалды», - деп хабарлады облыстық әкімшіліктен.
Еске сала кетейік, бұған дейін белгілі болғандай, БАӘ елшісінің кеңесшісі Сәкен Мамаштың жұбайы Карина Мамаш оны 10 жыл бойы жүйелі түрде физикалық және жыныстық зорлық-зомбылық жасады деп айыптаған еді. Кейін әйелдің мәлімдемесінен кейін дипломат қызметінен шеттетіліп, қылмыстық іс қозғалғаны хабарланды.