Атырауда адвокат Арман Жаменов сотталды, оны алаяқтық және сыбайлас жемқорлық жасады деп айыптады.
Telegram-арнасының «Nege.Aqsha» мәліметінше, ол сотталған адамға 1,3 млн теңге көлеміндегі пара арқылы шартты түрде мерзімінен бұрын босатуды қамтамасыз етуге уәде берген.
Бұл соманың 300 мың теңгесін ол заңгерлік қызмет көрсеткені үшін өзіне қалдыруды жоспарлаған, ал 1 млн теңгені ҚАЖБ және облыстық сот қызметкерлеріне пара ретінде беруді көздеген.
Сотта Жаменов кінәсін толық мойындады. Оның айтуынша, ол қаржы тапшылығына байланысты осындай қадамға барған. Ол әйелі мен балалары ем қабылдап жатқанын, сондықтан оған шұғыл түрде ақша қажет болғанын айтты.
«Отбасы алдында әке ретіндегі маңызымды жоғалтқым келмеді. Қылмыс жасауға оны әйелінің көз жасы мен өзінің дәрменсіздігі итермеледі», - делінген іс материалдарында.
Сот Арман Жаменовты алдап иемденуге оқталу, сондай-ақ пара беруге итермелеу бойынша кінәлі деп тауып, оған 1,5 жыл бас бостандығын шектеу жазасын тағайындады.
Еске салайық, ақпан айында бұрынғы мәдениет және спорт министрі Арыстанбек Мұхамедиұлы, оның әйелі Галия Искакова және адвокат Мұстахим Төлеевке қатысты үкім шығарылды.
Экс-министрдің жұбайына адвокат Төлеевке 220 млн теңге беруде делдалдық жасады деген айып тағылды. Тергеу нұсқасы бойынша, адвокат жұбайларды бұл қаражатты сот шешіміне әсер ету үшін пайдаланатынына сендірген.
Нәтижесінде Мұхамедиұлы пара беруге оқталуда кінәлі деп танылып, оның бұрынғы жазасы 8 жылдан 11 жылға бас бостандығынан айыру мерзіміне ауыстырылды. Еске салайық, ол мемлекеттік сатып алу шарты аясында Алтын адамның әлем мұражайлары бойынша шеруі халықаралық көрмесін өткізу кезінде 146 млн теңге ұрлауда, сондай-ақ мәдениет және спорт министрі қызметінде өкілеттігін теріс пайдалануда кінәлі деп танылған.
Оның жұбайы парақорлықта делдалдық жасағаны үшін 6 ай бас бостандығынан айыру жазасына кесілді. Адвокат ерекше ірі көлемдегі алаяқтықта кінәлі деп танылып, 6 жыл 8 ай бас бостандығынан айыру жазасына кесілді.