Астана қаласы әкімдігінің баспасөз қызметі бірқатар мердігер жол-құрылыс ұйымдары жұмыстарды өз есебінен қайта жасауға мәжбүр болатынын хабарлады.
Көктемгі тексеру барысында 2021 жылдан 2022 жылға дейін, яғни астананың әкімі Құлгинов болған кезеңде жөндеу жұмыстары жүргізілген бірнеше көшелерде ақаулар анықталғаны хабарланды:
- Жетіген көш., А. Пушкин көш. бастап Ж. Досмұхамедұлы көш. дейін - «Сотис групп» ЖШС;
- Қабанбай батыр даңғ., Сарайшық көш. бастап Қорғалжын тас жолына дейін - «Сотис групп» ЖШС;
- Жеңіс даңғ., Есенберлин көш. бастап Бөгенбай батыр даңғ. дейін - «Сотис групп» ЖШС;
- Р. Қошқарбаев даңғ., Қордай көш. бастап М. Төлебаев көш. дейін - «Сотис групп» ЖШС;
- А.Иманов көш., А. Янушкевич көш. бастап Ш. Уәлиханов көш. дейін - «Айя Сервис» ЖШС;
- Алаш тас жолы, жол өткелінен Жолымбет көш. дейін - «Айя Сервис» ЖШС;
- Мәңгілік Ел даңғ., М1 көпірінен Бұхар жырау көш. дейін - «Энергодор Компаниясы» ЖШС;
- Еңлік Кебек көш., Сұлтан Бейбарыс көш. бастап Болашақ көш. дейін - «РЕКМА КЗ» ЖШС.
«Аталған учаскелерді жөндеу жұмыстарын жүргізуге жауапты мердігер ұйымдар кепілдік міндеттемелерге сәйкес жол төсемінің ақауларын өз қаражаты есебінен жоюға кіріседі. Бұл жұмыстар жүйелі түрде және қолайлы ауа райы жағдайлары басталған кезде жүргізілетін болады», - делінген хабарламада.
Сонымен қатар әкімдікте биыл ұзындығы 50 көшеден асатын және шамамен 60 км құрайтын жолдарды жөндеу, сондай-ақ 20-ға жуық ірі нысанды іске асыру жоспарланып отырғанын мәлімдеді, олардың бір бөлігі ағымдағы жылы аяқталатын болады.