Полиция қызметкерлері Ақмола облысындағы автомобиль жолдарының күтімі мен жай-күйіне жауапты 14 лауазымды тұлғаны жауапкершілікке тартты. Негізгі бұзушылықтар қарды уақтылы жинамау және жол төсемін тазаламау болды.
Polisia.kz мәліметінше, жауапкершілікке тартылғандардың қатарында: жергілікті атқарушы органдардың өкілдері, жол пайдалану учаскелерінің (ЖПУ) басшылары және теміржол өткелдеріне жауапты ҚТЖ жол дистанциясының бастықтары бар.
«Полиция департаменті басшылығының бастамасымен, ағымдағы жылдың 8 қаңтарында Ақмола аймағының аумағында қысқы кезеңде автомобиль жолдарының күтімін тексеру бойынша, атап айтқанда, жолдың жүру бөлігін қардан уақтылы тазалау, тайғаққа қарсы материал себу, қар қабатын кесу және жою бойынша ауқымды рейдтік іс-шаралар өткізілді», - делінген хабарламада.
Белгілі болғандай, бұзушылықтардың бірі «Астана-Петропавл» трассасында анықталды. Учаскені күту талаптарын орындамағаны үшін жергілікті ЖПУ бастығы әкімшілік жауапкершілікке тартылды.
Осы трассаның басқа учаскелерінде, сондай-ақ «Алматы-Екатеринбург» халықаралық автомобиль жолында да осыған ұқсас бұзушылықтар анықталды. Барлық жағдайда уәкілетті қызметтер жол төсемінің тазалығын қамтамасыз етпеген, бұл апаттық жағдайлардың туындау қаупін тудырады.
Еске салайық, 3 қаңтарда Ақмола облысындағы «Астана-Щучинск» трассасында Қоғам және Қаратал ауылдары арасында қатты боран мен тайғақ салдарынан жаппай жол-көлік оқиғасы болып, онда 95 автомобиль соқтығысты.
9 қаңтарда «ҚазАвтоЖол» ҰК» АҚ баспасөз қызметі апатқа дейінгі автокөлік шеруін сүйемелдеудің бейнежазбасын жариялады. Камералардағы кадрлардан жүргізушілердің шеруді сүйемелдеу кезінде ережелерді сақтамай, бір-бірінен озып кеткені көрінеді.