Антикор Қостанай облысында автомобиль жолдарының құрылысы мен жөндеуін бақылау барысында жұмыс құнының негізсіз қымбаттағанын анықтады.
Ведомствоның баспасөз қызметінің мәліметінше, әкімдіктер жөндеу сметасына жоба сомасының 2% мөлшерінде күтпеген шығыстарды енгізген, ал заң бойынша мұндай шығындар көзделмеген.
Нәтижесінде жолдарды жөндеу құны 840 млн теңгеге өскен.
«Сонымен қатар, сметаны қалыптастыру кезінде сметалық пайданы есептеу бойынша енгізілген өзгерістер ескерілмеген. Ескі норматив – 8% қолданылған (жаңа бойынша 5%), бұл да жобалардың қымбаттауына әкелді», - делінген хабарламада.
Сонымен қатар, Антикор қызметкерлері мердігер орындаған жұмыстардың сапасын бақылау жолдардың тек кейбір учаскелерінде ғана жүргізілгенін анықтады.
«Әкімдіктер қандай жолдар зертханалық зерттеуден өтетінін өздері таңдаған. Нәтижесінде жыл сайын жөнделетін учаскелердің 20%-30% Жол активтері сапасының ұлттық орталығының филиалымен тексерілмеген», - делінген хабарламада.
Белгілі болғандай, Меңдіқара ауданында сынақтар ұзындығы 28 км болатын «Боровской-Ұзынағаш» жолының тек 3 км учаскесінде ғана жүргізілген.
Мониторинг қорытындысы бойынша, Қостанай облысының әкімдігі келісімшарттардың шарттарын қайта қарап, күтпеген шығыстарды алып тастаған. Мердігер ұйымдар негізсіз алынған 32 млн теңге көлеміндегі қаражатты қайтаруға міндеттелген.
Еске сала кетейік, қазан айында Антикор автомобиль жолдары саласындағы жүйелі сыбайлас жемқорлық тәуекелдерін анықтаған. Сонда 2023-2024 жылдары мемлекеттік органдарға азаматтардан жолдардың төмен сапасына қатысты 20 мыңнан астам шағым түскені айтылған болатын. Қоғам мұны сыбайлас жемқорлықпен байланыстырады.
2024 жылдың басынан бері Антикор осы салада 24 қылмыстық іс тіркеген. Ведомство қызметкерлері сыбайлас жемқорлық тәуекелдері жолдарды салу мен жөндеудің барлық кезеңдерінде байқалатынын анықтаған.