Қаржылық мониторинг агенттігі (ҚМА) әлеуметтік осал топтарға – көпбалалы отбасыларға, жетімдерге және мүгедектігі бар адамдарға арналған пәтерлерді заңсыз иемдену фактісі бойынша тергеу бастады.
Ведомство баспасөз қызметінің мәліметінше, 2014–2016 жылдары «Төленді» тұрғын үй құрылыс кооперативінің төрағасы А. Байжуманов үлескерлердің ақша қаражатын ұрлаудың ауқымды схемасын ұйымдастырған. Осы қылмыстары үшін ол сотталып, сегіз жылға бас бостандығынан айыру жазасына кесілді.
Осыдан кейін үйлердің құрылысын аяқтауды Астана әкімдігі қамтамасыз етті. Олардағы тұрғын үй-жайлардың бір бөлігі әлеуметтік осал санаттағы азаматтарға беруге арналған еді.
Алайда Байжуманов бас бостандығынан айыру орындарынан босатылғаннан кейін жаңа құқыққа қайшы схема әзірледі. Ол кейіннен ресімделген жалған құжаттарды пайдалана отырып, пәтерлерді заңсыз иемденуден тұрды.
Нәтижесінде 80-нен астам «жалған үлескер» зардап шеккендер деп танылып, уәкілетті ұйымнан 170 жылжымайтын мүлік объектісіне меншік құқығын заңсыз алды.
Тергеу Байжуманов пен оның сыбайластары пәтерлерді өтеусіз алғаннан кейін оларды үшінші тұлғаларға одан әрі сатуды жоспарлағанын анықтады.
Осылайша, құқық қорғау органдары жалпы сомасы 2,3 млрд теңгеден асатын тұрғын үйді заңсыз иемдену әрекетінің жолын кесті.
Күдіктілерге қатысты сот күзетпен ұстау түріндегі бұлтартпау шарасын таңдады. Тергеу жалғасуда.
Еске сала кетейік, бұған дейін Солтүстік Қазақстан облысы Жамбыл ауданының Пресновка ауылында бір жыл бұрын салынған тұрғын үйге жетімдер, көпбалалы отбасылар және мүгедектігі бар балаларды тәрбиелеп отырған отбасылар қоныстанған еді.
Алайда жаңа тұрғындардың айтуынша, бұл үйлерде тұру мүмкін емес дерлік болған. Тұрғындар ғимараттардың түгелдей мұздайтынын хабарлаған: қабырғалары жарылып, тігістерінен жел соғып, терезелер мен есіктер мұзбен жабылады.