Қазақстан Президенті Қасым-Жомарт Тоқаев Сыбайлас жемқорлыққа қарсы іс-қимыл агенттігін (Сыбайлас жемқорлыққа қарсы іс-қимыл ұлттық бюросы) Ұлттық қауіпсіздік комитетіне (ҰҚК) қосу арқылы қайта ұйымдастыру туралы жарлыққа қол қойды.
Үкімет баспасөз қызметінің мәліметінше, мемлекеттік басқару жүйесін жаңғырту және тиімділігін арттыру мақсатында Мемлекет басшысы Сыбайлас жемқорлыққа қарсы іс-қимыл ұлттық бюросын ҰҚК-ге қосу арқылы қайта ұйымдастыруды, сондай-ақ ҰҚК ведомствосы – Сыбайлас жемқорлыққа қарсы іс-қимыл қызметін құруды жөн көрді.
Сонымен қатар Президент Мемлекеттік қызмет істері агенттігіне (МҚІА) қайта ұйымдастырылған Сыбайлас жемқорлыққа қарсы іс-қимыл ұлттық бюросының сыбайлас жемқорлыққа қарсы саясатты қалыптастыру және іске асыру, сыбайлас жемқорлыққа қарсы іс-қимыл саласындағы үйлестіру, сыбайлас жемқорлық құқық бұзушылықтар жасауға ықпал ететін себептер мен жағдайларды барынша азайту, сондай-ақ сыбайлас жемқорлыққа қарсы мәдениетті қалыптастыру жөніндегі функциялары мен өкілеттіктерін беруді жөн көрді.
ҰҚК және МҚІА берілетін функциялар мен өкілеттіктерге сәйкес Сыбайлас жемқорлыққа қарсы іс-қимыл ұлттық бюросының құқықтары мен міндеттемелерінің құқықтық мирасқорлары болды. Сонымен қатар, ҰҚК-ге бір ай ішінде Президентке жаңа Сыбайлас жемқорлыққа қарсы іс-қимыл қызметі туралы ереженің жобасын ұсыну міндеті жүктелді.
Сондай-ақ ведомство үкіметпен және МҚІА-мен бірлесіп, қайта ұйымдастырылған Сыбайлас жемқорлыққа қарсы іс-қимыл ұлттық бюросының штат санын қайта бөлу жөнінде ұсыныстар енгізуі тиіс.
Бұдан басқа, МҚІА-ға бір ай ішінде Президенттің қарауына Агенттік туралы ережеге өзгерістер мен толықтырулар енгізу туралы жарлықтың жобасын енгізу міндеті жүктелді.
«ҚР Үкіметі 2025 жылғы 1 қыркүйекке дейінгі мерзімде осы Жарлықтан туындайтын заң жобасын әзірлеп, ҚР Парламенті Мәжілісінің қарауына енгізсін. Осы Жарлықтың орындалуын бақылау ҚР Президенті Әкімшілігіне жүктелсін. Осы Жарлық қол қойылған күнінен бастап күшіне енеді», - делінген жарлықтың қорытынды бөлімінде.