Алматы облысының Еңбекшіқазақ ауданында заңсыз салынған кірпіш зауыты бұзылды.
Облыстық әкімдіктің баспасөз қызметінің мәліметінше, 2005 жылы «Құрылыс Көмек ХХІ» ЖШС өндірістік база салу және оған қызмет көрсету үшін жер телімін алған.
Кейін аудандық әкімдіктің рұқсатымен жер теліміне кірпіш зауыты салынған. Алайда 2021 жылы ескі зауыт бөлшектеліп, қажетті құжаттарсыз жаңа зауыт тұрғызылған.
Нәтижесінде мемлекеттік сәулет-құрылыс бақылау басқармасы «Құрылыс Көмек ХХІ» ЖШС-нің кірпіш зауытына рұқсатсыз және хабарламасыз қосымша ғимарат салғанын анықтаған.
«Компания әкімшілік жауапкершілікке тартылып, өз еркімен салынған ғимаратты бұзуға міндеттелді. «Құрылыс Көмек ХХІ» ЖШС белгіленген мерзімге дейін орындамағаннан кейін, соттың бұзу туралы шешімі мәжбүрлеп орындалды», - делінген хабарламада.
Сонымен қатар, 2022 жылғы тамызда компанияға кірпіш зауытының басқа бөліктерін бұзу туралы жаңа талап арызы түскен.
Осыған қарамастан, «Құрылыс Көмек ХХІ» ғимаратты бөлшектемеген. Кейін соттың бұзу туралы шешімі мәжбүрлеп орындалғаны хабарланады.