Қазақстан Үкіметі Алматы облысындағы «Алатау» арнайы экономикалық аймағының аумағында толық циклді биофармацевтикалық кешен салу жобасын мақұлдады. Жобаға тартылатын жеке инвестициялардың жалпы көлемі 32,5 млрд теңгені құрайды.
ЖОБА ТУРАЛЫ НЕ БЕЛГІЛІ
Үкіметтің баспасөз қызметінің мәліметінше, инвестициялық келісім денсаулық сақтау министрлігі мен «Steppe pharmaceuticals» ЖШС арасында жасалған. Тиісті қаулыға премьер-министр Олжас Бектенов қол қойды.
Жоба Алматы облысындағы «Алатау» АЭА аумағында толық циклді биофармацевтикалық кешен салуды көздейді. Өндіріс фармацевтика саласындағы жоғары технологиялық қуаттарды оқшауландыруға бағытталған.
Кәсіпорында 20 атаудағы дәрілік заттарды шығару жоспарлануда. Тізімге онкологиялық және сирек кездесетін ауруларды емдеуге арналған препараттар, сондай-ақ иммунобиологиялық құралдар енеді.
ӨНДІРІС ҚАШАН ІСКЕ ҚОСЫЛАДЫ
Кәсіпорынның іске қосылуы 2031 жылға жоспарланған. Жобалық қуатқа шығу 2032 жылы, ал негізгі бағыттар бойынша толық өндіріс цикліне көшу 2034 жылы күтілуде.
Дәрі-дәрмек шығарудан басқа, жоба ғылыми-зерттеу және тәжірибелік-конструкторлық жұмыстарды қамтиды. Сондай-ақ меншікті R&D бағытын дамыту, биоэквиваленттілік зерттеулерін жүргізу, тіркеу досьесін дайындау және халықаралық GMP стандарттарын енгізу көзделген.
Кешен базасында қазақстандық мамандар үшін оқыту және біліктілікті арттыру жүйесін құру жоспарлануда.
ЖОБАДАН ҚАНДАЙ ӘСЕР КҮТІЛЕДІ
Жобаны іске асыру елдің дәрілік қауіпсіздігін нығайтуға және Алматы облысында заманауи фармацевтикалық инфрақұрылым құруға мүмкіндік береді.
Шамамен 60 жаңа жұмыс орнын құру күтілуде.
Үкіметте қазіргі уақытта Қазақстанда фармацевтика өнеркәсібі саласында 8 ірі инвестициялық жоба іске асырылып жатқанын хабарлады.
Өткен жылдың қорытындысы бойынша отандық фармацевтикалық өнім өндірісінің көлемі 191,1 млрд теңгені құрады, бұл 2024 жылмен салыстырғанда 8,7%-ға артық. Салаға тартылған инвестициялардың жалпы көлемі 390 млрд теңгеден асты.