Президент Қасым-Жомарт Тоқаев Қазақстан Республикасының «Алатау қаласының арнайы құқықтық режимі туралы» Конституциялық заңына қол қойды. Құжат қаланың ерекше құқықтық мәртебесін және экономиканы, инвестицияны, цифрлық инфрақұрылымды және әлеуметтік саланы қамтитын басқарудың жаңа моделін енгізеді.
ЖАҢА ҚҰҚЫҚТЫҚ РЕЖИМ НЕМЕНІ КӨЗДЕЙДІ
Ақорда баспасөз қызметінің хабарлауынша, Конституциялық заңның негізгі мақсаты Алатау қаласының жедел және тұрақты дамуына жағдай жасау болды.
Құжатта қаланың арнайы құқықтық мәртебесі инновацияларды дамыту, инвестиция тарту және экономикалық өсу үшін тәуелсіз экожүйені қалыптастырудың жаңа тәсілі болып табылатыны айтылған.
Заң кәсіпкерлік, кеден ісі, цифрлық активтер, ойын бизнесі, қаржы нарығы, сәулет, экология, мәдениет және спортты қоса алғанда, бағыттардың кең ауқымын реттейді.
Сондай-ақ Алатау қаласын мемлекеттік басқарудың жаңа моделі бекітілді.
АЛАТАУ РЕЗИДЕНТІ МӘРТЕБЕСІН КІМ АЛА АЛАДЫ
Конституциялық заң «Алатау резиденті» құқықтық мәртебесін енгізеді. Ол жеке және заңды тұлғаларға жекелеген санаттар бойынша беріледі.
Резидент санатына байланысты арнайы құқықтық режимді қолдану көлемі, сондай-ақ тиісті құқықтар, міндеттер мен талаптар айқындалады.
ҚАЛА ҚАЛАЙ ДАМИДЫ
Заңға сәйкес, қаланың ұзақ мерзімді инвестициялық және технологиялық дамуы стратегиялық құжаттар негізінде көзделген. Оларға Алатау қаласының ұзақ мерзімді даму жоспары, бас жоспары және даму стратегиясы жатады.
Заңның жеке блогы цифрлық инфрақұрылымға қатысты. Алатаудың «ақылды қала» ретінде жұмыс істеуі үшін инфрақұрылым объектілері мен қоғамдық қауіпсіздік жүйелері туралы деректер қалалық кеңістікті басқарудың бірыңғай қалалық цифрлық платформасына біріктіріледі.
Конституциялық заң сонымен қатар инвестициялық ахуалды, инвесторларға кепілдіктерді, салық-бюджет саясатын, жер қатынастарын және қала дизайнына қойылатын талаптарды реттейді.