Көлік министрлігі жолаушыларды, багаждар мен жүктерді әуе тасымалдау қағидаларына өзгерістер енгізу жобасын әзірледі. Құжат жолаушылардың құқықтарын қорғауға, қызмет көрсету сапасын арттыруға және қолданыстағы қағидаларды жетілдіруге бағытталған жаңа нормаларды көздейді.
ЖОБА ҚАНДАЙ ӨЗГЕРІСТЕРДІ ҰСЫНАДЫ
Көлік министрлігінің мәліметінше, 2015 жылғы 30 сәуірдегі № 540 «Әуе көлігінде жолаушыларды, багаждар мен жүктерді тасымалдау қағидаларын бекіту туралы» инвестициялар және даму министрінің бұйрығына өзгерістер мен толықтырулар енгізу жобасы әзірленді.
Жоба музыкалық аспаптарды тасымалдау тәртібін реттеуді көздейді. Оларды белгіленген талаптар сақталған кезде әуе кемесі салонында қол жүгі ретінде, жеке жолаушы орнында не тіркелген багажда тасымалдауға рұқсат беру ұсынылады. Сондай-ақ, ұшақ салонында домбыра мен қобызды қоса алғанда, музыкалық аспаптарды сенімді қорғаныш футлярында тасымалдау мүмкіндігін бекіту ұсынылады. Олардың өлшемдері 110×35×30 см, ал салмағы 10 кг аспауы тиіс.
ЖОЛАУШЫЛАРҒА ҚАТЫСТЫ ҚАНДАЙ НОРМАЛАР БАР
Сондай-ақ, жобамен әуекомпаниялар белгілеген шарттарға сәйкес жануарларды әуе кемесінің салонында тасымалдау мүмкіндігін қарастыру ұсынылады.
Бұдан басқа, құжатта мүгедектігі бар жолаушыларға әуе тасымалы бойынша жеңілдіктер беруді заңнамалық тұрғыдан бекіту туралы норма бар.
Әуе кемесін сыйымдылығы аз кемемен ауыстырған кезде жоба жолаушылардың жекелеген санаттарына басымдықпен орын беруді көздейді. Ең алдымен, кәмелетке толмаған жолаушыларға, мүгедектігі бар адамдарға, ауыр науқастары бар жолаушыларға, жүкті әйелдерге және зейнеткерлік жастағы азаматтарға тасымалдау қамтамасыз етілуі тиіс.
ЖОЛАУШЫЛАРДЫҢ ҚҰҚЫҚТАРЫН ҚОРҒАУ ҮШІН НЕНІ ӨЗГЕРТУ ҰСЫНЫЛАДЫ
Жолаушылардың құқықтарын қорғауды күшейту мақсатында жобамен жолаушыны жеткізуді кешіктіргені үшін айыппұлды төлеудің нақты мерзімін белгілеу ұсынылады — тиісті өтініш берілген күннен бастап 10 күнтізбелік күннен аспайды.
Сондай-ақ, тасымалдаушының кінәсі дәлелденген жағдайда, тіркелмеген багаждың зақымдануы үшін әуекомпаниялардың жауапкершілігін қарастыру ұсынылады.
ЖОБА ТАЛҚЫЛАНУЫ ҚАЙДА ӨТУДЕ
Нормативтік құқықтық актінің жобасы жария талқылау үшін «Ашық НҚА» интернет-порталында орналастырылған. Мүдделі тұлғалар құжатпен танысып, белгіленген тәртіппен өз ұсыныстары мен ескертулерін жібере алады.
ҚҰЖАТ ҚАБЫЛДАНҒАННАН КЕЙІН НЕ ӨЗГЕРЕДІ
Ұсынылып отырған өзгерістердің қабылдануы әуе тасымалының ашықтығы мен ыңғайлылығын арттыруға, саланың әлеуметтік бағытын күшейтуге және жолаушылардың құқықтарын қосымша қорғауды қамтамасыз етуге мүмкіндік береді деп күтілуде.
