Дәрігерлер Өскемендегі «Қазмырыш» ЖШС кәсіпорнындағы оқиғадан зардап шеккендердің жағдайы туралы айтты. Медициналық көмекке бес адам жүгінді, оның екеуі ауруханаға жатқызылды.
ЗАРДАП ШЕККЕНДЕР ТУРАЛЫ НЕ БЕЛГІЛІ
Шығыс Қазақстан облыстық мамандандырылған медициналық орталығы бас дәрігерінің орынбасары Мұрат Нүрбикеновтің айтуынша, алғашқы науқастар қабылдау бөлімшесіне 8:45-те түсті.
Барлығы медициналық көмекке төрт ер адам және бір әйел жүгінді. Барлық зардап шеккендерге қажетті көмек көрсетіліп, компьютерлік томографияны қоса алғанда, тексеруден өткізілді.
АУРУХАНАҒА КІМ ЖАТҚЫЗЫЛДЫ
Үш зардап шегуші беткейлік жарақаттар мен сыдырымдар алды. Тексеруден кейін олар үйге жіберілді.
Екі науқас стационарда қалып отыр.
1980 жылы туған ер адам өте ауыр жағдайда. Оның дене бетінің 90%-дан астамы күйіп, жоғарғы тыныс жолдары мен көздің қасаң қабығы күйік алған, сондай-ақ жарақаттан кейінгі шок жағдайы байқалады. Ол реанимацияға жатқызылды.
1974 жылы туған ер адам бел омыртқасының компрессиялық сынуы және өсінділерінің сынуымен ауруханаға жатқызылды. Ол травматология бөлімшесінде жатыр.
ҚАРСЫ ІС-ҚИМЫЛ ШАРАЛАРЫ
Жедел штаб отырысында Шығыс Қазақстан облысының (ШҚО) әкімі Нұрымбет Сақтағанов арнайы комиссияны ШҚО бойынша Еңбек инспекциясы мемлекеттік комитетінің департаменті құратынын хабарлады. Сондай-ақ ШҚО экология департаменті апат салдарын жою кезеңінде ауа сапасын үздіксіз бақылауды қамтамасыз ететін болады.
Әкімнің айтуынша, қаза тапқандар мен зардап шеккендердің отбасыларына психологиялық және материалдық көмек көрсетіледі. Сонымен қатар, кәсіпорынның одан әрі жұмыс істеу мүмкіндігін бағалау және қауіпсіздік техникасының сақталуын бақылауды күшейту жоспарлануда.
КОНТЕКСТ
Бұған дейін «Қазмырыш» ЖШС қорғасын зауытының электролиз цехының балқыту бөлімшесінде шаң ұстағыш құрылғы жарылып, салдарынан өрт шығып, құрылымдар құлаған еді.
Алдын ала мәлімет бойынша, жеті адам зардап шекті, оның екеуі қаза тауып, тағы бесеуі ауруханаға жатқызылды. Оқиға орнында құтқарушылар жұмыс істеп, жедел штаб құрылып, ондаған қызметкер мен техника жұмылдырылды.
```