Павлодар облысының әкімі Асаин Байханов Ақсу қаласына барып, 19 маусымда болған дауылдан кейін қаланың қалпына келтірілуін тексерді. Сол кездегі табиғи апат қала тұрғыны Марина Пахомованың өмірін қиды.
Байханов өзінің Instagram-парақшасында хабарлағандай, қайтыс болған әйелдің отбасына қажетті көмек көрсетілді.
«Өтемақы төленіп, коммуналдық қызметтерге 2 жылға алдын ала төлем жасалды, сондай-ақ бар несиелерді өтеуге қаражат бөлінді», - делінген хабарламада.
Әкім қалада нысандарды қалпына келтіру бойынша көп жұмыс атқарылғанын, алайда қарқынға көңілі толмайтынын атап өтті.
«Үш күн ішінде барлық құлаған ағаштарды, әсіресе қалалық коммуналдық қызметтердің әрекетсіздігіне ең көп шағым түскен Ақсу шағын ауданында тазалауды қамтамасыз етуді тапсырдым», - деп хабарлады Байханов.
Сонымен қатар ол ТЖ-дан кейінгі алғашқы күндері халықпен әлсіз байланыс орнатқаны үшін Ақсу қаласының әкіміне, оның орынбасарына және аппарат басшысына сөгіс жариялады.
Сондай-ақ Асаин Байханов қала әкіміне уәкілетті органдардың екі басшысын қызметінен босатуды немесе лауазымын төмендетуді тапсырды. Облыс әкімі келесі аптада Ақсу қаласына қайта барып, барлық жұмыстың ұйымдастырылуын тексеруді жоспарлап отыр.
Еске салайық, 19 маусымда Павлодар облысына қатты дауылды жел соқты. Ауа райының қолайсыздығынан зардап шекті 16 адам, оның ішінде үш бала. Ең қайғылы оқиға Ақсу қаласында болды: құлаған ағаш бұтағы автомобильдің алдыңғы әйнегін тесіп, жолаушыны мерт етті. 47 жастағы әйел таксидің алдыңғы орындығында отырған. Ағаш оның кеуде қуысын тесіп өткен. Жарақаттан ол оқиға орнында қайтыс болды.