East Star Resources Plc Орталық Қазақстандағы Снежное учаскесінде жаңа геофизикалық аномалияны анықтады. Оның ұзындығы шамамен 1,7 км құрайды, алайда аномалияның шығу тегі мен алтын кенді минералданудың болуы әлі де қосымша зерттеулерді қажет етеді.
ГЕОФИЗИКАЛЫҚ ЗЕРТТЕУЛЕР НЕ КӘРСЕТТІ
East Star Resources Plc хабарлағандай, компания 2026 жылы бір жыл бұрын жұмыстар жүргізілген учаскеден шамамен 1 км шығысқа қарай қосымша зерттеулер жүргізді.
Бұл аумақтың беткі қабатында бұрын өзгерген жанартаулық жыныстар мен көптеген кварц желілері табылған. Компания мұндай белгілер алтын кенді минералдануды көрсетуі мүмкін екенін атап өтеді.
Жаңа зерттеулер батыстан шығысқа қарай шамамен 1,7 км созылып, шамамен 100 м тереңдіктен басталатын аномалияны анықтады. Ол екі бағытта да ашық күйінде қалуда.
НӘТИЖЕЛЕР НЕГЕ ҚОСЫМША ТЕКСЕРУДІ ҚАЖЕТ ЕТЕДІ
Аномалияның амплитудасы 7-ден 9 мВ/В-қа дейін құрайды. Компанияның бағалауынша, мұндай көрсеткіштер осы типтегі алтын кенді жүйелерге тән болуы мүмкін.
Сонымен қатар, аномалияның көзі әзірге анықталмаған. Оны анықтау үшін қосымша зерттеулер және, мүмкін, бұрғылау жұмыстары қажет болады. Осылайша, анықталған геофизикалық ерекшелік өздігінен кен орнының бар екенін әлі растамайды.
СНЕЖНОЕ УЧАСКЕСІ ТУРАЛЫ НЕ БЕЛГІЛІ
Снежное учаскесі ұқсас минералдану типі бар екі белгілі алтын кен орнының арасында орналасқан. Оның беткі қабатында бұрын құрамында алтыны бар сынамалар да алынған.
East Star Resources Plc бас директоры Алекс Уокер компания учаскені одан әрі геологиялық барлау жұмыстары үшін перспективалы деп қарастыратынын мәлімдеді. Зерттеудің келесі кезеңінің мерзімдері компанияның басқа жобаларын ескере отырып анықталады.
БҰЛ НЕГЕ МАҢЫЗДЫ
Геофизикалық аномалия іздеу жұмыстарының алғашқы кезеңдерінің бірінің нәтижесі болды. Оның алтын кенді минералданумен байланысты екенін анықтау үшін учаскені одан әрі зерттеу қажет.
East Star Resources Plc Қазақстанда алтын мен мыс барлауын жүргізеді. Оның жобаларының ішінде — Xinhai Mining Services Limited компаниясымен Verkhuba кен орнын игеру бойынша бірлескен кәсіпорын, сондай-ақ басқа да перспективалы учаскелердегі барлау жұмыстары.
