Батыс Қазақстан облысындағы (БҚО) Этикa кеңесі Ақжайық ауданы Чапаев ауылдық округінің әкімі Биболат Зинуллинді жұмыстан босатуды ұсынды. Себеп – жұмыс уақытында қызметтік көлікті мас күйінде басқару.
НЕ БОЛДЫ
«Мой город» басылымының мәліметінше, мәселе 17 маусымда өткен БҚО бойынша Мемлекеттік қызмет істері агенттігі (МҚІА) департаменті жанындағы Этикa кеңесінің кезекті отырысында қаралды.
Ақжайық ауданы Чапаев ауылдық округінің әкімі Биболат Зинуллинге қатысты тәртіптік іс қозғалды. Отырыста хабарланғандай, полиция қызметкерлері лауазымды тұлғаны жұмыс уақытында қызметтік көлікті мас күйінде басқару кезінде ұстаған.
ОҚИҒА ҚАШАН БОЛДЫ
БҚО бойынша МҚІА департаменті басшысының орынбасары Дәурен Хаировтың айтуынша, оқиға 2026 жылғы 12 наурызда болған. Әкімге қатысты ол басқаратын Чапаев ауылдық округінің аумағында әкімшілік хаттама жасалған.
Дәурен Хаиров оқиға туралы ақпарат сот шешімдері мен БАҚ жарияланымдарына тұрақты мониторинг жүргізу барысында анықталғанын атап өтті. Оның сөзінше, мәліметтер әкімшілік құқық бұзушылықтар базасынан да алынған.
СОТ ТАЛҚЫЛАУЫ ҚАЛАЙ ЖҮРДІ
Дәурен Хаировтың хабарлауынша, бірінші сатыдағы сот Биболат Зинуллиннің пайдасына шешім шығарып, оны ақтаған.
Кейін апелляциялық сатының қаулысы жағдайды өзгерткен.
ЭТИКА КЕҢЕСІ НЕЛІКТЕН ЖҰМЫСТАН БОСАТУДЫ ҰСЫНДЫ
Тәртіптік істі қарау қорытындысы бойынша Этикa кеңесі Биболат Зинуллинді жұмыстан босату туралы ұсыныс берді.
Сонымен қатар, құқық бұзушылық жасалған кезде лауазымды тұлғаға қатысты толық емес қызметтік сәйкестік туралы ескерту түріндегі тәртіптік жаза қолданылғаны белгілі болды.
Айта кетейік, сонда Биболат Зинуллин аяқталмаған нысан үшін бюджет қаражатын аударған. Этикa кеңесі бұл істі қазан айында қараған.