БҚО-дағы Әдеп жөніндегі кеңес отырысында Ақжайық ауданы Жаңабұлақ ауылдық округінің әкімі Жамбыл Дабысқалиевке қатысты тәртіптік іс қаралды. 
«Мой Город» басылымының мәліметінше, жергілікті тұрғын Есқалиев өз мекенжайына былапыт сөйлеген шенеунікке шағымданған. Дабысқалиев кінәсін жоққа шығармай, пікірталас барысында Есқалиевтің бірінші болып балағат сөздер қолданғанын атап өтті.
Оның айтуынша, оқиға бірінші қыркүйекте Жаңабұлақ ауылында болған. Сол күні әкім мектеп саптүзеуінен қайтып келе жатқан.
«Маған ауылмен шөп тиелген жүк көлігі жүріп жүр деп хабарлады. Бұрын ауылдастар менің ауылымызда жүк көліктерінің жүруіне рұқсат бермеуді, жаңа асфальтты бұзбауын бірнеше рет өтінген. Тіпті шлагбаум мен жол белгілерін орнаттық. Ауыр жүк көліктері үшін айналма жол салдық. Оған қарамастан, жүк көлігі ауылға кірді. Малға арзан бағамен, бар болғаны 7 мың теңгеге жем-шөп әкелген екен. Бұл ауылдастар үшін тиімді болды. Бірақ бұл жағдай шөп сатумен де айналысатын Есқалиевке ұнамады. Ол бізге шөп әкелемін және қалай болғанда да елді мекенге кіремін деді. Мен одан айналма жолды пайдалануды өтіндім. Мен Есқалиевті бала кезінен білемін, бірге өстік. Бірақ ол былапыт сөйлеп, балағаттай бастады. Ондаған ауылдас куә болды. Мен шыдай алмай, мен де балағаттадым. Кінәмді мойындаймын», - деді Дабысқалиев.
Әкімді тыңдаған Әдеп жөніндегі кеңес мүшелері кез келген жағдайда мемлекеттік қызметші эмоциясын ұстап, арандатушылыққа берілмеуі керек екенін атап өтті. Олардың айтуынша, ауылмен ауыр техниканың жүрмеуін полицейлер қадағалауы керек, әкім емес.
Соңында Кеңес Жамбыл Дабысқалиевті сөгіс түрінде тәртіптік жауапкершілікке тарту туралы шешім қабылдады.
Еске сала кетейік, өткен жылдың қараша айында Қостанай облысы Новоильиновка ауылдық округінің әкімі Мақаш Таймасов желі қолданушыларына бейнероликтегі дау-дамаймен танымал болды. Жазбада Таймасовтың сағат 23:00-ден кейін алкоголь сатып алуға тырысып, бас тартқан соң, сатушыға қаратып былапыт сөздер айтқаны көрінген.
Кейін әкім Әдеп жөніндегі кеңес алдында жауап берді. Шенеунік былапыт сөздерді сатушыға қаратып айтпағанын, тек сөз байланысы үшін қолданғанын айтты. Алайда кеңес мүшелерін мұндай дәлелдер сендіре алмады. Нәтижесінде Мақаш Таймасов жұмыстан шығарылды.