Мемлекеттік қызмет істері агенттігінің этика жөніндегі комиссия отырысында Қарағанды әкімі Мейрам Кожухов ескерту түріндегі тәртіптік жаза алды, ал Алматы облысы Еңбекшіқазақ ауданының әкімі Талғат Байедиловты мүлдем жұмыстан босату ұсынылды.
Zakon.kz мәліметінше, комиссия Қарағанды әкімінің әрекеттері әлеуметтік желілерде азаматтар тарапынан теріс реакция мен сын тудырғанын анықтады.
Еңбекшіқазақ ауданы әкімінің әрекеттерінен жер заңнамасының бұзылуы анықталды. Бұл бұзушылықтар мемлекеттік қызметшінің беделін түсіретін теріс қылық ретінде бағаланып, комиссия оны жұмыстан босатуды ұсынды.
Жыл басынан бері Мемлекеттік қызмет істері агенттігі 497 тексеру жүргізіп, нәтижесінде 6 935 бұзушылық анықтағаны атап өтілді.
«Талдау көрсеткендей, мемлекеттік органдар лауазымдық нұсқаулықтарды әзірлеу, мемлекеттік қызметшілерге тәртіптік жазалар қолдану, әкімшілік мемлекеттік лауазымды иеленуге арналған конкурстық рәсімдерді өткізу кезінде және т.б. бұзушылықтарға жол береді. Бұл ретте конкурстық рәсімдердің бұзылуы Ақтөбе және Павлодар облыстарының мемлекеттік органдарында жиі кездесті», – деп атап өтті ведомствода.
Белгілі болғандай, тәртіптік жазаларды қолдану кезіндегі бұзушылықтардың ең көп саны Ауыл шаруашылығы министрлігінде, Қаржы министрлігінің Мемлекеттік кірістер комитетінде, сондай-ақ Ақмола, Алматы және Павлодар облыстарының мемлекеттік органдарында анықталды.
Өткен жылдың қараша айында Қостанай облысы Новоильинов ауылдық округінің әкімі Макаш Таймасов желі қолданушыларына даулы бейнеролик арқылы танымал болды. Жазбада Таймасовтың сағат 23:00-ден кейін алкоголь сатып алуға тырысып, бас тартқан соң сатушыға бағытталған былапыт сөйлегені көрінген.
Кейін әкім Этика кеңесінің алдына келді. Шенеунік былапыт сөздер сатушыға арналмағанын, тек сөздерді байланыстыру үшін қолданылғанын айтты. Алайда кеңес мүшелерін мұндай дәлелдер сендірмеді. Нәтижесінде Макаш Таймасов жұмыстан шығарылды.
Биылғы қазан айында БҚО Ақжайық ауданы Жаңабұлақ ауылдық округінің әкімі Жамбыл Дабысқалиев жергілікті тұрғынға бағытталған былапыт сөзі үшін сөгіс алды.