Ақтөбе облысының прокуратурасы полиция департаменті және экономикалық тергеу департаменті бірлесіп, интернет арқылы психотроптық заттарды сатумен айналысқан ұйымдасқан қылмыстық топтың қызметін тоқтатты.
ҚЫЛМЫСТЫҚ ТОП ҚАЛАЙ ӘРЕКЕТ ЕТТІ
Прокуратураның мәліметінше, схема Telegram мессенджерін қолдана отырып, жүйелі негізде құрылған және «байланыссыз сату» қағидаты бойынша жұмыс істеген.
Тапсырыстар қашықтан қабылданып, есеп айырысу дропперлердің банк карталары арқылы жүргізілген.
Жедел-тергеу іс-шаралары барысында Қарағанды, Солтүстік Қазақстан, Ақмола және Ақтөбе облыстарының, сондай-ақ Астана қаласының аумағында қылмыстық топтың 6 қатысушысы анықталып, ұсталды. Заңсыз айналымнан 10 кг-нан астам психотроптық зат тәркіленді.
ТЕРГЕУ НӘТИЖЕЛЕРІ
2025 жылғы қыркүйекте Ақтөбе облысының арнайы прокурорлары бүкіл ел бойынша жұмыс істеген «Qymyz shop» интернет-дүкені арқылы психотроптық заттарды сатумен айналысқан ұйымдасқан топқа қатысты қылмыстық істі тергеуді аяқтады. Іс материалдары сотқа жіберілді.
2026 жылғы 17 наурызда Ақтөбе облысының қылмыстық істер жөніндегі мамандандырылған ауданаралық соты топтың барлық қатысушыларын кінәлі деп таныды. Оларға 15 жылдан 17 жылға дейін бас бостандығынан айыру жазасы тағайындалды.
АЛДЫН АЛУ ЖӘНЕ БАҚЫЛАУ
2026 жылдың басынан бастап облыс прокуратурасы құқық қорғау органдарымен және қоғаммен бірлесіп, есірткі қылмысына қарсы іс-қимыл бойынша жүйелі жұмыс жүргізуде:
- интернет-есірткі дүкендерінің жарнамасы бар 20-дан астам граффити жазуы анықталып, жойылды, осы фактілер бойынша 2 сотқа дейінгі тергеу басталды;
- 500-ден астам профилактикалық іс-шара өткізілді, оның ішінде оқу орындарында 300 дәріс, 80 кездесу және 4 байқау, қамту — 13 мыңнан астам адам;
- профилактикалық фильмдерді шамамен 16 мың оқушы көрді;
- 2 мың банк шоты және 65,5 млн теңге сомасына 34 мың шетелдік карта бұғатталды;
- «Киберқадағалау» жүйесі арқылы есірткіні жарнамалаған және таратқан 260 Telegram-арнаға және интернет-ресурстарға қолжетімділік шектелді.