Астанада «Олимпиадалық емес спорт түрлері бойынша спортты дамыту дирекциясы» ММ бюджет қаражатының жымқырылуы анықталды.
Қаржылық мониторинг агенттігінің (ҚМА) баспасөз қызметінің мәліметінше, ММ-нің лауазымды тұлғалары 2021 жылдан 2022 жылға дейін оқу-жаттығу жиындарын өткізуге бөлінген бюджет қаражатын иемденген.
Жиындар іс жүзінде өткізілмегені, жаттықтырушылар спортшылардың шығуы, тұруы және тамақтануы туралы жалған есептер тапсырғаны хабарланады. Мемлекетке келтірілген залал сомасы 40 млн теңгеден астамды құрады.
«Осы факті бойынша сотқа дейінгі тергеп-тексеру жүргізілуде, күдікті сот санкциясымен қамауға алынды. ҚПК-нің 201-бабының талаптарына сәйкес өзге де мәліметтер жария етуге жатпайды», - делінген хабарламада.
Еске салайық, бұрын Алматы спорт басқармасының және оның ведомстволық ұйымының бұрынғы қызметкерлері бюджет қаражатын жымқыруға күдікті екені белгілі болған еді. Олар ведомствода нақты жұмыс істемейтін тұлғаларға жалақы есептеу және төлеу жолымен 56 млн теңгеден астам қаражатты жымқырды деп айыпталуда.
Сондай-ақ, Шымкентте дене шынықтыру және спорт басқармасының №3 жоғары спорт шеберлігі мектебінің шығыс жекпе-жегінен екі жаттықтырушысы 27 млн теңгеден астам қаражатты иемденгені хабарланған болатын. Бюджет қаражаты спортшылардың оқу жиындары мен жарыстарға баруына арналған еді.
Айыпталушылар кінәларын толық мойындап, сотқа дейінгі тергеу сатысында келтірілген залалды өтеген. Ақша қайтарылғандықтан, спорт мектебі дирекциясы тарапынан сотталушыларға шағымы болмаған. Нәтижесінде сот жаттықтырушыларға шартты жаза тағайындады.